L-ixkla tal-ħaruf imsajrin fiz-zalza jkunu tajbin ħafna meta servuti fuq sodda tal-patata maxx għax iz-zalza titħallat mal-patata u tagħmel palat tajjeb ferm. Din ir-riċetta hija ftit differenti, b’togħma ftit ħelwa tal-qargħa ħamra u tat-tamal li jmorru tajjeb ħafna mal-ħaruf.
Ħin: sagħtejn
Isservi: 8 persuni
Ingredjenti:
- 600g qargħa ħamra, imnaddfa
- 750ml stokk tat-tiġieġ
- Dqiq, biex tiksi
- 8 ixkla tal-ħaruf
- 2 mgħaref żejt veġetali
- 1 basla kbira, imqattgħa
- 250ml inbid aħmar
- 1 bott ta’ 400g tadam sħiħ, mgħaffeġ
- 150g tamal sħiħ, mingħajr għadma u maqsum min-nofs
- 1 bastun tal-kannella (cinnamon stick)
- Melħ u bżar mitħun frisk
- 2 mgħaref tursin frisk, imqatta’
- Patata maxx biex isservi
Metodu:
- Qatta’ l-qargħa ħamra għat-tul fi flieli ta’ 2ċm, imbagħad aqsam kull biċċa mill-wisa’ fi tnejn.
- Poġġi d-dqiq fuq platt kbir ċatt u dawwar kull xikel fid-dqiq sakemm jinkesa kollu. Farfar id-dqiq żejjed. Saħħan iż-żejt f’kazzola baxxa u wiesgħa u aqli l-ixkla għal 2-3 minuti jew sakemm jieħdu l-kulur. Neħħi minn ġot-taġen u poġġihom fuq platt.
- Fl-istess kazzola qalli l-basla sakemm tirtab. Erġa’ poġġi l-ixkla fil-kazzola u ferra’ fuqhom l-inbid u l-istokk. Żid ukoll it-tadam, it-tamal u l-bastun tal-kannella. Ħalli kollox jiftaħ jagħli, imbagħad baxxi n-nar u għatti l-kazzola. Tektek għal 45 minuta, filwaqt li kull tant ħin iddawwar l-ixkla biex isiru sew minn kull naħa.
- Żid il-qargħa ħamra, melħ u bżar u kompli tektek mingħajr ma tgħatti l-kazzola għal 35 minuta oħra, sakemm iz-zalza taqbad tagħqad.
- Servi sħun fuq sodda tal-patata maxx. Ferrex iz-zalza fuq kollox u roxx bit-tursin.
Ippruvajt din ir-riċetta? Kif sibtha? Għidilna billi tħalli kumment jew ir-rating hawn taħt u agħfas share.
