Riċetta: Irkotta moħmija bil-flieli tal-larinġ

Baked ricotta with oranges Irkotta moħmija bil-flieli tal-larinġ

See this recipe in English: Baked ricotta with oranges

Deżerta differenti ta’ rkotta ħelwa moħmija fil-forn. Il-kontorn ta’ larinġ bil-brandy jagħmel kuntrast pjaċevoli u qawwi mat-togħma ħelwa b’palat kremuż tal-irkotta.

Preparazzjoni: 20 minuta

Ħin totali: 45 minuta

Isservi: 4 persuni

Ingredjenti:

  • 350 g irkotta
  • 1 bajda
  • 75 g zokkor tal-ġelu (icing sugar)
  • ½ kuċċarina essenza tal-vanilla
  • Krema doppja, biex isservi

Għall-larinġ:

  • 3 larinġiet
  • 75 g zokkor fin (caster sugar)
  • 2 kuċċarini għasel
  • 1 mgħarfa brandy
  • 125 ml ilma

Tħejjija:

  1. Saħħan il-forn għal temperatura ta’ 170°C. Idlek 6 reċipjenti li jidħlu fil-forn  (jesgħu daqs ta’ kikkra komuni jew ftit aktar, bħal ramekins jew bwieqi żgħar) bi ftit żejt u iksihom minn ġewwa bil-kartaforn.
  2. Poġġi l-irkotta, il-bajd, iz-zokkor tal-ġelu u l-essenza tal-vanilla fi proċessur tal-ikel u ħawwadhom sakemm ikollok taħlita lixxa.
  3. Qassam it-taħlita bejn is-sitt reċipjenti u tektek ftit kull waħda mal-mejda biex tneħħi xi arja li tkun inqabdet fit-taħlita.
  4. Aħmi għal 25 minuta jew sakemm tara li għaqdu. Ħallihom jibirdu sew, imbagħad daħħalhom fil-friġġ għal siegħa.
  5. Sadanittant  ipprepara l-flieli tal-larinġ. Qaxxar il-larinġ billi tpoġġi l-larinġa wieqfa fuq platt u b’sikkina l-ewwel taqta’ l-biċċiet ta’ fuq u ta’ taħt, imbagħad tqaxxar bis-sikkina stess mal-kurvaturi tal-larinġa minn fuq għal isfel sakemm iddur id-dawra kollha. Qattagħha flieli bis-sikkina.
  6. Żomm il-meraq li joħroġ minnhom u poġġih f’kazzola żgħira mal-għasel, zokkor u ilma fuq nar baxx. Ħawwad sakemm jinħall iz-zokkor. Għolli n-nar u ħalli t-taħlita tagħli għal 8 minuti jew sakemm tara li għaqdet ftit. Ħalli t-taħlita tibred għal nofs siegħa.
  7. Żid il-brandy mat-taħlita u ferragħha fuq il-flieli tal-larinġ.
  8. Aqleb l-irkotta fuq il-platti li se sservi fihom. Poġġi l-flieli tal-larinġ fil-wiċċ ta’ kull waħda u ferra’ wkoll ftit mix-xropp. Servi bil-krema.

Ippruvajtha din ir-riċetta? Għoġbitek? Ħalli kumment u r-rating tiegħek hawn taħt u agħfas share biex inkomplu nwasslulek iktar riċetti bħal din.