Il-pitravi nsibuha s-sena kollha għalhekk tajjeb li fix-xhur sajfin ninkluduha mal-insalati tagħna għax, apparti li tagħti palat u kulur, hija sors tajjeb ta’ antiossidant.
Ħin: siegħa
Isservi: 4 persuni
Ingredjenti:
- 4 isdra tat-tiġieġ; kull waħda miftuħa ktieb (butterfly)
- 4 sinniet tewm, misħuqin
- Kuċċarina żerriegħa tal-bużbież
- 2 mgħaref żejt taż-żebbuġa
- Melħ u bżar mitħun frisk
Għall-insalata:
- 300 g ross long grain
- 500 g pitravi
- 4 basliet ħodor żgħar friski (spring onions), imqattgħin irqiq
- 2 mgħaref nagħniegħ frisk, imqatta’
- 2 mgħaref ħabaq frisk, imqatta’
- Qoxra maħkuka u meraq ta’ larinġa
- Mgħarfa ħall tal-inbid abjad
- 3 mgħaref żejt taż-żebbuġa
- 4 mgħaref yoghurt Grieg, biex isservi
Tħejjija:
- Fi skutella ħawwad flimkien iż-żewġ mgħaref żejt taż-żebbuġa, it-tewm, il-bużbież u ftit bżar u melħ u ogħrok l-isdra tat-tiġieġ bit-taħlita. Warrabhom għal aktar tard.
- Ipprepara l-insalata. Poġġi l-pitravi f’kazzola u għattiha bl-ilma. Għalli l-pitravi sakemm tibda tirtab, imbagħad saffiha u ħalliha tibred. Sakemm tkun qed tagħli l-pitravi għalli r-ross ukoll, imbagħad saffih u aqilbu fi skutella kbira biex jibred. Qaxxar u qatta’ l-pitravi f’dadi żgħar u żidhom mar-ross; żid ukoll il-basal, in-nagħniegħ u l-ħabaq, u ħawwad kollox.
- Fi skutella żgħira ħabbat flimkien it-3 mgħaref żejt taż-żebbuġa, il-ħall, il-meraq u qoxra tal-larinġa, melħ u bżar. Ferra’ din it-taħlita fuq ir-ross u ħawwad.
- Saħħan grilja u ixwi l-isdra tat-tiġieġ minn kull naħa sakemm isiru kompletament.
- Qassam it-taħlita tar-ross u l-pitravi fuq il-platti; qatta’ l-isdra tat-tiġieġ mixwijin u rranġahom fuq ir-ross. Servi fil-pront bil-yoghurt Grieg fil-wiċċ.
Ippruvajtha din ir-riċetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.