Riċetta: Insalata tar-rukola u l-pitravi bil-larinġ u l-ġewż

Riċetta: Insalata tar-rukola u l-pitravi bil-larinġ u l-ġewż

Din l-insalata mimlija togħmiet li jikkuntrastaw ma' xulxin: ir-rukola u t-tewm (daqsxejn pikkanti) jikkuntrastaw mal-pitravi u l-larinġ (daqsxejn ħelwin); għandek il-ġewż, imbagħad għandek il-ħall u ż-żjut mal-istragun (tarragon) biex jgħaqqdu kollox flimkien. Din l-insalata fiha wkoll ħafna kuluri u żgur li toħloq sensazzjonijiet mhux tas-soltu fil-palat. 

Ħin: 10 minuti

Isservi: 4 persuni

Enerġija: 186 kalorija

Ingredjenti:

  • 3-4 kikkri rukola
  • 2 pitravi kbar jew 4 żgħar, mixwijin, imqaxxrin u mqattgħin flieli
  • Larinġa mqaxxra u maqsuma flieli
  • 3-4 mgħaref ġewż imkisser
  • 3 imgħaref stragun frisk imqatta'

Għall-vinaigrette

  • Kuċċarina ħall balsamiku (balsamic vinegar)
  • Melħ skont il-gosti
  • Mgħarfa ħall tax-sherry
  • Tewma maħkuka
  • Mgħarfa żejt tal-ġewż (walnut oil)
  • 2 imgħaref żejt taż-żebbuġa
  • Bżar iswed mitħun skont il-gosti

Tħejjija:

  1. Ħallat l-ingredjenti tal-insalata kollha flimkien ġo skutella kbira.
  2. Ħawwad flimkien il-ħall balsamiku, il-ħall tax-sherry, it-tewm, il-melħ u ż-żjut. Roxx fuq l-insalta u ħawwad. Roxx il-bżar iswed skont il-gosti.

 

 Ladarba misjurin, il-pitravi jżommu fil-friġġ sa tlett ijiem.

Ippruvajt din ir-riċetta?  Kif sibtha? Għidilna billi tħalli kumment jew ir-rating hawn taħt u agħfas share.