Għalkemm ir-rebbiegħa titlob għal ikel ftit aktar tqil minn dak tas-sajf, kultant ikollna aptit ta’ xi ħaġa ħafifa wkoll. Din l-insalata kkulurita tikkumbina ħaxix u frott tal-istaġun mal-quinoa. Il-quinoa (imlissna "kinwà") hi tip ta' żerriegħa li toriġina mill-Amerika t'Isfel u li tintuża fl-ikel tipikament minflok ir-ross. Hawn Malta tinsab għall-bejgħ minn kull supermarket.
Ħin: 45 minuta
Isservi: 4 persuni
Ingredjenti:
- Basla ħadra żgħira friska, il-parti bajda biss, imqattgħa rqiq
- 2 kuċċarini qoxra tal-larinġ tad-demm, maħkuka
- Kuċċarina qoxra tal-lumi, maħkuka
- Mgħarfa meraq tal-lumi
- Mgħarfa weraq tal-kosbor frisk, imqatta’ rqiq
- ¼ kuċċarina żerriegħa tal-kosbor, mitħuna
- ¼ kuċċarina paparika
- 4 imgħaref żejt taż-żebbuġa
- 170 g quinoa nejja
- 450 ml ilma
- Melħ
- 4 larinġiet tad-demm imdaqqsin
- Avokado, imqattgħa
- 2 pitraviet, mgħollijin u mqattgħin flieli
Tħejjija:
- Qaxxar il-larinġ billi tpoġġi l-larinġa wieqfa fuq platt u b’sikkina l-ewwel taqta’ l-biċċiet ta’ fuq u ta’ taħt, imbagħad tqaxxar bis-sikkina stess mal-kurvaturi tal-larinġa minn fuq għal isfel sakemm iddur id-dawra kollha. Qattagħha flieli bis-sikkina. Żomm il-meraq li joħroġ minnhom.
- Ħabbat flimkien il-basla ħadra, il-qxur tal-larinġ u tal-lumi, il-meraq tal-larinġ u tal-lumi, il-weraq tal-kosbor, niskata melħ, iż-żerriegħa tal-kosbor, il-paparika u ż-żejt taż-żebbuġa.
- F’kazzola poġġi l-ilma, il-quinoa u niskata melħ, poġġiha fuq in-nar u, xħin tagħli, baxxi n-nar u tektek għal 10 minuti jew sakemm jinxtorob il-likwidu.
- Neħħi l-kazzola minn fuq in-nar u tella’ l-quinoa b’furketta biex tifridha.
- Fi skutella kbira ħallat il-quinoa mal-larinġ tad-demm u l-avokado. Ferra’ fuqhom it-taħlita tal-meraq, basla u l-ħwawar u ħallat kollox flimkien.
- Aqsam l-insalata fuq erba’ platti u fuqha qassam u poġġi l-flieli tal-pitravi.
Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.
Would you like to read this recipe in English? Let us know in the comments section below!