Riċetta: Insalata bil-frawli u l-mozzarella

Mozzarella and strawberry salad

Issa drajna naraw il-frott imħallat mal-insalati, u din id-darba għandna l-frawli, li t-togħma ħelwa tiegħu tagħmel kuntrast mat-togħma ftit morra tal-aruka (rucola), mielħa tal-prosciutto u kremuża tal-mozzarella. Il-kuluri vivaċi jagħmlu kuntrast sabiħ ukoll.

Ħin: 20 minuta

Isservi: 4 persuni

Ingredjenti:

  • 250 g frawli, maħsul u mnaddaf, u maqsum fi tnejn jew erbgħa skont id-daqs tiegħu
  • 400 g mozzarella friska tal-buflu, jew mozzarella friska tal-gosti tiegħek, imfarrka biċċiet kbar
  • 100 g prosciutto, imqatta’
  • 150 g rucola
  • Basla, maqsuma min-nofs għat-tul imbagħad imqattgħa rqiq għat-tul ukoll
  • Mgħarfa butir
  • Kuċċarina zokkor
  • 80 ml żejt taż-żebbuġa
  • 2 imgħaref ħall balsamiku
  • Mgħarfa meraq tal-lumi

Tħejjija:

  1. Dewweb il-butir f’taġen fuq nar moderat u żid iz-zokkor.
  2. Ħawwad sakemm jinħall iz-zokkor u jibda jieħu kulur kannella, imbagħad żid il-basla u kompli qalli sakem tiħmar sew mingħajr ma tinħaraq.
  3. Qassam ir-rucola bejn erba’ platti. Qasam ukoll il-mozzarella, il-prosciutto, il-basal u l-frawli.
  4. Fi skutella żgħira ħabbat flimkien iż-żejt taż-żebbuġa, il-ħall balsamiku u l-meraq tal-lumi; roxx it-taħlita fuq l-insalata u servi.

Ippruvajtha din ir-riċetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.

Would you like to read this recipe in English? Let us know in the comments section below!