Riċetta kompluta bil-kontorn b’kollox u li tlestiha fi ftit ħin biss. Il-ftett tal-ħut abjad jista’ jkun dak li jogħġob lilek – illum fis-supermarkets issib għażla kbira ta’ ħut iffriżat.
Preparazzjoni: 10 minuti
Ħin totali: 30 minuta
Isservi: 4 persuni
Ingredjenti:
- 350 g patata, maħsula u mqattgħa roti rqaq
- 2 kurratiet (leeks), il-parti bajda u ħadra ċara biss, imnaddfin u mqattgħin roti rqaq
- Melħ u bżar mitħun frisk
- 80 ml żejt taż-żebbuġa
- 2 imgħaref ġobon Parmiġġan, maħkuk
- 100 g lewż pur, mitħun
- 2 bajdiet, imħabbtin
- 4 flettijiet ħut abjad (madwar 500 g b’kollox), maqsumin min-nofs għat-tul
- 2 imgħaref tursin frisk, imqatta’
Tħejjija:
- Saħħan il-forn għal temperatura ta’ 220°C.
- Idlek dixx (17 ċm x 24 ċm) bi ftit żejt u ppostja l-patata fil-qiegħ. Ferrex il-kurrat fuq il-patata u roxx bil-melħ u bżar. Roxx 2 imgħaref żejt u l-ġobon Parmiġġan ukoll. Aħmi għal 20 minuta sakemm il-patata tirtab u tibda tiħmar.
- Sadanittant, poġġi l-bajd u l-lewż mitħun fi skutelli separati. Bill kull biċċa mill-ħut kompletament fil-bajd, imbagħad fil-lewż sakemm jinksew. Agħfas ftit il-kisi mal-ħuta biex jeħel sew.
- Saħħan il-kumplament taż-żejt f’taġen non-stick fuq nar moderat u aqli l-ħut għal 2 minuti fuq kull naħa jew sakemm isir sew.
- Qassam il-taħlita ta’ patata u kurrat fuq il-platti u poġġi l-biċċiet tal-ħut fuqhom. Roxx bit-tursin u servi fil-pront.
Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.
Would you like to read this recipe in English? Let us know in the comments section below!
