Dan il-ħobż Grieg huwa versatili ħafna biex tużah, għax kemm taqsam waħda min-nofs u ddaħħal l-ingredjent li trid fil-vojt tal-ħobża. Tista’ timliehom bħalma timla sandwich jew bl-ingredjenti li soltu nużaw fuq pizza, imbagħad issaħħanhom b’kollox. Il-ħobż li ma tużax tista’ faċilment tiffriżah.
Ħin: 30 minuta; u ħin biex titla’ l-għaġina
Kwantità: 8
Ingredjenti:
- 500 g dqiq plain
- Kuċċarina ħmira mnixxfa
- Kuċċarina melħ
- Kuċċarina zokkor
- 2 imgħaref żejt taż-żebbuġa
- 350 ml ilma fietel
Tħejjija:
- Għarbel id-dqiq fi skutella u żid il-ħmira, iz-zokkor u l-melħ, u ħallat kollox sew.
- Żid iż-żejt, ħawwad, u ibda ferra’ ftit ftit l-ilma filwaqt li tgħaqqad l-ingredjenti. Jista’ jkun li jkollok bżonn ftit anqas jew ftit aktar ilma, jiddependi kemm jixrob id-dqiq. Tella’ t-taħlita fuq il-mejda u agħġinha sakemm issir lixxa u tiġġebbed.
- Idlek skutella biż-żejt u poġġi l-għaġina fiha. Għatti b’sarvetta nadifa u ħalliha f’post għas-sħana sakemm tirdoppja fid-daqs, għal 30-40 minuta.
- Oħroġ l-għaġina minn ġol-iskutella u aħdimha ħafif. Aqsamha fi tmien biċċiet indaqs u ffurmahom fi blalen. Iftaħ kull biċċa f’ċirku bil-lembuba jew b’idejk. Poġġihom fuq tilar miksi bil-kartaforn u taqqab kull waħda ’l hemm u ’l hawn b’furketta.
- Saħħan il-forn għal temperatura ta’ 230°C. Poġġi t-tilar fuq jew qrib il-forn sakemm jilħaq it-temperatura mixtieqa.
- Aħmi għal 4-5 minuti sakemm jiħmaru u jintefħu.
Ippruvajtha din ir-riċetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.
Would you like to read this recipe in English? Let us know in the comments section below!
