Dan il-ħass mimli huwa appetizer ideali għaliex huwa sabiħ u interessanti bħala ikel kemm għaliex jolqot l-għajn u kemm biex tieklu. Barra minn hekk tista' tlestih minn qabel biex ma tibqax fil-kċina sal-aħħar minuta meta jkunu ġejjin il-mistednin.
Tagħmel 15-il porzjon
Ingredjenti:
- 450 g ikkapuljat tal-majjal
- 1/2 kikkra qastan (water chestnuts) imqatta'
- 1/2 kikkra karawett imkisser
- 2 imgħaref żejt tal-ġulġlien (sesame oil)
- Nofs basla bajda, mqattgħa
- Nofs mazz spring onions imqattgħin u l-parti ħadra mwarrba
- Mgħarfa tewm maħkuk
- Mgħarfa ġinġer frisk maħkuk
- Kuċċarina melħ
- 2 imgħaref soy sauce
- 2 imgħaref Hoisin sauce (jekk mhux disponibbli, agħmlu int billi ssegwi l-istruzzjonijiet hawn taħt)
- 1-2 imgħaref mustarda (Chinese hot mustard)
- 15-il werqa tal-ħass, imqattgħa fi kwadri ta' 8 ċm
Tħejjija:
- Fuq nar bati saħħan taġen għal madwar 30 sekonda.
- Żid iż-żejt tal-ġulġlien u dawwar fit-taġen sakemm jinkesa biż-żejt.
- Żid il-basal, it-tewm, il-parti l-bajda tal-ispring onion u l-ġinġer.
- Aqli għal ftit minuti sakemm it-taħlita ssir trasparenti.
- Għolli n-nar u żid l-ikkapuljat. Sajjar sakemm jismar ftit.
- Erġa' baxxi n-nar u żid il-melħ, il-qastan, is-soy sauce u l-Hoison sauce. Sajjar sakemm it-taħlita tevapora.
- Neħħi t-taġen minn fuq in-nar u żid il-mustarda skont il-gosti.
- Ħalli kollox jibred, għatti u poġġi fil-friġġ. Tista' żżommu fil-friġġ sa erbat ijiem.
- Meta tkun lest biex isservi, saħħan ġo microwave jew ġo kazzola.
- Poġġi ġo skutella, ferrex il-karawett fil-wiċċ, u servi mal-ħass.
Biex tagħmel il-Hoison sauce:
Ferragħ 2 imgħaref żejt tal-ġulġlien ġo skutella biex jintuża bħala bażi tal-Hoisin sauce. Żid 4 mgħaref soy sauce, 2 imgħaref peanut butter, Mgħarfa għasel jew zokkor ismar, 2 kuċċarini ħall abjad, niskata trab tat-tewm u niskata bżar iswed, u 20 qatra Tabasco jew simli.
Għoġbitek din ir-riċetta? Għidilna x'taħseb billi tħalli kumment hawn taħt u jekk jogħġbok agħmel like u share biex inkomplu nwasslulek riċetti li jogħġbuk.
