Din id-deżerta ħafifa hija tajba servuta kemm sħuna kif ukoll f’temperatura tal-kamra, għalkemm jekk tkun kemm kemm sħuna t-togħmiet tal-kannella u l-ħlewwa joħorġu aktar u jkun hemm kuntrast mal-kesħa tal-ġelat jew yoghurt bħalma jkun hemm ma’ torta tat-tuffieħ sħuna servuta wkoll ma’ ġelat.
Ħin: 20 minuta
Isservi: 4 persuni
Ingredjenti:
- 800 g għanbaqar Santa Rosa, maqsum min-nofs u mingħajr għadma
- 75 g zokkor fin (caster sugar)
- 300 ml inbid aħmar ħelu, bħal marsala
- Bastun tal-kannella (cinnamon stick)
- 2 ħlewwa stellata (star anise)
- Kuċċarina trab tal-qamħirrun (cornflour) maħlul f’mgħarfa ilma
- Ġelat jew yoghurt tal-vanilla, biex isservi
- Ġellewż imfarrak, biex iżżejjen
Tħejjija:
- F’kazzola ħallat l-inbid maz-zokkor u żid il-bastun tal-kannella u l-ħlewwa stellata. Poġġihom fuq nar moderat sakemm jinħall iz-zokkor, imbagħad żid l-għanbaqar, ħawwad u tektek għal 5 minuti. Tella’ l-għanbaqar u żid it-trab tal-qamħirrun maħlul fl-ilma, u ħawwad sakemm iz-zalza teħxien ftit.
- Servi l-għanbaqar biz-zalza tal-inbid fuqu ma’ ġelat jew yoghurt tal-vanilla u roxx bil-ġellewż.
