Riċetta: Krosta bil-ġobon mimlija bil-ħaxix tal-istaġun

Recipe: Cheese and vegetable gratin Riċetta: Krosta bil-ġobon mimlija bil-ħaxix tal-istaġun

Read this recipe in English: Recipe: Cheese and vegetable gratin

Din l-għaġina differenti magħmula bil-ġobon u polenta tagħmel bażi tqarmeċ, eċċellenti għall-ħaxix mixwi. Dan il-platt differenti imma delizzjuż huwa adattat ħafna biex jisserva bħala l-ewwel platt ta’ ikla.

Isservi: 8 porzjonijiet

Ingredjenti:

Għall-għaġina:

  • 1 ¼ kikkra dqiq ismar (whole wheat)
  • 1 kikkra ġobon cheddar, maħkuk
  • ½ kikkra polenta
  • 6 mgħaref butir, imqatta’ biċċiet żgħar
  • 3 mgħaref żejt taż-żebbuġa
  • 3 mgħaref ilma kiesaħ

Għall-mili:

  • 2 kurratiet (leeks), il-part l-bajda u ħadra ċara biss, imnaddfin u mqattgħin biċċiet kbar
  • 450g fjuri tal-brokkli
  • 2 basliet żgħar, jew waħda kbira, tal-bużbież (fennel bulbs), mingħajr iz-zkuk ta’ barra u ta’ ġewwa u mqattgħin għat-tul
  • ½ kikkra basal aħmar, imqatta’ għat-tul irqiq
  • Ras tewm
  • 1 mgħarfa klin frisk (rosemary), imqatta’
  • Melħ oħxon u bżar mitħun frisk
  • 2 mgħaref żejt taż-żebbuġa
  • 1 mgħarfa ħall tax-sherry
  • ⅓ kikkra paste taż-żebbuġ iswed
  • ½ kikkra ġbejniet bojod imnixxfin, imfarrkin

 Tħejjija:

  1. Saħħan il-forn għal temperatura ta’ 200°C.
  2. Biex tagħmel il-mili: poġġi l-kurrat, brokkli u basal tal-bużbież f’saff wieħed fuq dixx jew tilar kbir, poġġi wkoll ir-ras tewm mingħajr ma tqaxxarha. Roxx bil-melħ u l-bżar u ferrex il-klin. Roxx biż-żejt ukoll u ħawwad biex jinkesa kollox.
  3. Aħmi għal 35-45 minuta u qalleb il-ħaxix kull tant ħin. Oħroġ id-dixx mill-forn u iġbor ir-ras tewm. Roxx il-ħaxix bil-ħall u ħawad biex jinkesa. Ħalli l-ħaxix jibred.
  4. Biex tagħmel l-għaġina: idlek turtiera ta’ 28ċm, jew dixx kwadru ta’ 20ċm x 30ċm bil-butir.
  5. F’bieqja kbira poġġi l-butir u d-dqiq u b’subgħajk daħħal il-butir fid-dqiq sakemm jiġi bħal frak tal-ħobż, żid il-ġobon cheddar u l-polenta u ħawwadhom flimkien. Żid l-ilma u ż-żejt biex tgħaqqad l-ingredjenti flimkien u jkollok għaġina titfarrak. Aqleb l-għaġina fit-turtiera u ifrixha mal-qiegħ u l-ġnub. Ippressaha sew biex tifforma qoxra. Kessaħha sakemm tiġi bżonnha aktar tard.
  6. Meta l-ħaxix isir, naqqas it-temperatura għal 180°C. Aħmi l-għagina għal 15-il minuta sakemm tagħqad imma ma tiħmarx.
  7. Poġġi t-turtiera fuq tilar u idlek il-qiegħ tal-għaġina bil-paste taż-żebbuġ. Ifrex bil-ħaxix mixwi. Aqta’ l-biċċa ta’ fuq tar-ras tat-tewm u agħfas kull sinna ’l barra mill-qoxra għal fuq il-ħaxix. Roxx bil-ġbejniet imfarrkin u aħmi għal 25 minuta jew sakemm jiħmaru x-xfarijiet tal-għaġina.

 
Ippruvajt din ir-riċetta?  Kif sibtha? Għidilna billi tħalli kumment jew ir-rating hawn taħt u agħfas share.