L-għaġin il-forn huwa wieħed mill-platti favoriti tista’ tgħid ta’ kulħadd u jagħmel ikla sodisfaċenti ħafna għall-familja kollha. Din ir-riċetta hija ftit iktar ikkulurita u nutrittiva minn dik oriġinali għax miżjuda bil-ħaxix ukoll u l-laħam użat huwa t-tiġieġ, jiġifieri inqas xaħam.
Ingredjenti
Għal 4 persuni
- 1 mgħarfa żejt taż-żebbuġa
- Bott qamħirrun (310g), imsaffi
- ½ kikkra piżelli tal-friża
- 125g faqqiegħ (mushrooms) imqatta’
- 1 bżaru aħmar (capiscum), imnaddaf u mqatta’
- 60g butir
- ¼ kikkra dqiq
- 2 ½ kikkri ħalib
- 1 kikkra ġobon cheddar, maħkuk
- ½ kikkra ġobon Parmiġġan, maħkuk
- 400g għaġin mezzan, bħal pinen, nokkli jew fusilli
- 400g sider tat-tiġieġ, imqatta’ dadi żgħar
- 1 kikkra frak tal-ħobż frisk
- 2 mgħaref tursin frisk, imqatta’
- Melħ u bżar mitħun frisk
Metodu
- Saħħan il-forn għal temperatura ta’ 180°C.
- Għalli l-għaġin b’borma kbira ilma bil-melħ jagħli. Saffih u żommu għas-sħana.
- Saħħan iż-żejt taż-żebbuġa ġo taġen kbir fuq nar medju. Qalli d-dadi tat-tiġieġa sakemm jibdew jiħmaru u kif isiru tellagħhom b’mgħarfa mtaqqba għal ġo bieqja u warrabhom. Fl-istess taġen qalli l-bżar, il-faqqiegħ, il-piżelli u l-qamħirrun għal 2-3 minuti, imbagħad poġġihom fil-bieqja mat-tiġieġa. Żid melħ u bżar u ħawwad kollox flimkien.
- Dewweb il-butir f’kazzola, żid id-dqiq u ħawwad għal minuta. Neħħi minn fuq in-nar, żid il-ħalib u ħabbat sakemm ma jibqgħux jidhru boċċi. Erġa’ poġġi l-kazzola fuq in-nar u ħawwad sakemm it-taħlita tibda tagħli u tagħqad. Baxxi n-nar u tektek għal 2 minuti. Żid nofs il-ġobon cheddar u nofs il-ġobon Parmiġġan u ħawwad sakemm jinħallu. Neħħi l-kazzola minn fuq in-nar
- Ħallat flimkien l-għaġin, iz-zalza tal-ġobon, u t-tiġieġa bil-ħaxix. Ferra’ t-taħlita f’dixx tal-forn ta’ 2 litri.
- F’bieqja ħallat flimkien il-frak tal-ħobż, il-ġobon li jkun fadal, it-tursin, u melħ u bżar. Roxx it-taħlita fuq il-wiċċ tal-għaġin u aħmi għal 30 minuta jew sakemm il-wiċċ jieħu lewn dehbi.
Ippruvajt din ir-riċetta? Kif sibtha? Għidilna billi tħalli kumment jew ir-rating hawn taħt u agħfas share.