Għalkemm l-għaġin huwa wieħed mill-platti l-aktar popolari mal-Maltin, dan l-ingredjent nixtruh lest mill-ħwienet u normalment nixtru dak imnixxef. Ftit biss minna ssibilhom il-magna tal-għaġin id-dar, kontra t-Taljani li l-magna tal-għaġin tista’ tgħid li hija parti mill-kċina tagħhom. Jekk xtaqtu tkunu tafu kif isir l-għaġin frisk, hawn għandkom ir-riċetta ta’ għaġin li jinħadem bl-idejn.
Tistgħu ukoll iżżidu togħmiet u kuluri differenti mal-għaġin. Dan għandu jitħallat mal-bajd qabel iżżidu mad-dqiq. Trid ukoll iżżid ftit aktar dqiq mir-riċetta oriġinali biex jagħmel tajjeb għal-likwidu żejjed li tkun żidt. L-għaġina tista’ żżommha fil-friġġ għal 24 siegħa, imbagħad tħalli t-temperatura titla’ għal dik tal-kamra qabel tiftaħha.
Ingredjenti
Għal 4 persuni
- 2 kikkri dqiq
- 3 bajdiet
- ½ kuċċarina melħ
- ½ kuċċarina żejt taż-żebbuġa ekstra verġni
- Għażla ta’ togħmiet u kuluri, jekk tixtieq
Biex tagħmel l-għaġina
- Fuq wiċċ nadif li se taħdem fuqu, ferra’ d-dqiq u ffurmah gozz għoli. Ħaffer in-nofs tal-gozz.
- Ifqa’ l-bajd fil-ħofra tad-dqiq. Żid il-melħ u ż-żejt taż-żebbuġa u ħallathom flimkien bil-mod b’furketta.
- Bil-mod ibda għaqqad billi twaqqa’ d-dqiq ftit ftit għal ġol-ħofra, biex fl-aħħar tgħaqqad l-ingredjenti.
- B’idejk kompli għaqqad sakemm ikollok għaġina, jekk tkun xotta żid ftit ilma, u jekk tkun iddellek żid ftit aktar dqiq.
- Kompli agħġen sakemm issir lixxa u elastika, madwar 8-10 minuti. Geżwer l-għaġina fil-cling film u ħalliha toqgħod għal 15-il minuta.
- Aqsam l-għaġina f’erba’ biċċiet indaqs. Żomm kull biċċa mgħottija sakemm tkun qed taħdem il-biċċiet l-oħra.
- Roxx l-għaġina, il-lembuba, il-wiċċ u jdejk bid-dqiq.
Biex tiftaħ l-għaġina b’idejk
- Iċċattja b’idejk biċċa għaġina biex tifforma ovali.
- Roxx tilar bid-dqiq biex tqiegħed l-għaġin lest fuqu.
- Poġġi l-għaġina ovali fuq il-wiċċ u erġa’ roxxha bid-dqiq.
- Iftaħ l-għaġina bil-lembuba billi tibda min-nofs u tgerbeb ’il-barra. Għolli l-għaġina minn mal-wiċċ kull darba biex ma teħilx.
Kuluri u togħmiet:
Tal-ispinaċi (ħadra): Għalli 25g spinaċi u itħanha fi proċessur tal-ikel. Ippressa l-ispinaċi f’passatur biex tneħħi l-ilma qabel tħallatha mal-bajd. Żid 3 mgħaref purè tal-ispinaċi mal-bajd qabel titfgħu mad-dqiq. Jekk it-taħlita tkun iddellek, żid aktar dqiq sakemm ikollok għaġina ratba u tleqq.
Tat-tadam (oranġjo): Żid 2 ½ mgħaref kunserva mal-bajd qabel iżżidu mad-dqiq.
Tal-pitravi (roża fl-aħmar): Saħħan il-forn għal temperatura ta’ 205°C. Ixwi pitrava kbira għal 45 minuta, jew sakemm tirtab. Qaxxarha u itħanha fi proċessur tal-ikel. Żid 4 mgħaref purè tal-pitravi mal-bajd qabel iżżidu mad-dqiq.
Tal-ħxejjex aromatiċi (imnaqqax): Żid ½ kikkra ħxejjex aromatiċi mqattgħin irqiq ħafna mal-bajd qabel iżżidu mad-dqiq.
Ippruvajt din ir-riċetta? Kif sibtha? Għidilna billi tħalli kumment jew ir-rating hawn taħt u agħfas share.
