To read this recipe in English: Recipe: Pasta with chicken and Chorizo sausage
Iz-zalzett chorizo, li huwa Spanjol u għalhekk insibuh ħafna bħala ingredjent tal-paella, imur tajjeb ħafna wkoll meta mħallat mal-għaġin. Din ir-riċetta tajba u ħafifa hija perfetta għal ikla ta’ matul il-ġimgħa. It-tiġieġ tari u t-togħma ftit taħraq taz-zalzett flimkien maz-zalza tat-tadam bil-ħabaq jagħmlu taħlita perfetta. Biex jaqbad din iz-zalza l-aħjar li tuża għaġin oħxon bħal penne u fusilli.
Isservi: 4 persuni
Ingredjenti:
- 3 isdra tat-tiġieġ mingħajr għadam u ġilda, imqattgħin f’daqs ta’ gidma
- 400g għaġin
- 1 mgħarfa żejt veġetali
- 100g zalzett chorizo, imqatta’
- 400g polpa tat-tadam
- Ponn weraq tal-ħabaq, imqatta’ rqiq
- Ġobon Parmiġġan, maħkuk
- Melħ u bżar mitħun risk
Tħejjija:
- Għalli borma kbira bl-ilma bil-melħ. Għalli l-għaġin mingħajr ma ssajru żżejjed (al dente).
- Sadanittant saħħn iż-żejt f’taġen kbir fuq nar moderat u aqli z-zalzett għal 5 minuti.
- Żid il-biċċiet tat-tiġieġ u kompli sajjar għal 5 minuti oħra.
- Żid it-tadam u meta z-zalza tiftaħ tagħli tektek għal 15-il minuta.
- Żid il-ħabaq, bżar mitħun frisk u melħ u kompli tektek għal 5 minuti.
- Saffi l-għaġin u żidu maz-zalza fit-taġen. Ħawwad fuq in-nar għal minuta.
- Servi bil-Parmiġġan maħkuk.
Għoġbitek din ir-riċetta? Għidilna billi tħalli l-kummenti tiegħek hawn taħt, u agħmel ir-rating tiegħek u share biex inkomplu nwasslulek aktar riċetti li jogħġbuk.