Riċetta: Għaġin bil-ħaruf u ġobon feta

Barley with goat and feta cheese: Għaġin xgħir bil-ħaruf u ġobon feta

F’din ir-riċetta tipikament Griega nsibu l-għaġin xgħir - li huwa tip ta' għaġin żgħir forma ta' ross - mħallat mal-ħaruf u ż-żebbuġ u, ma jonqosx ma’ platt Grieg, il-ġobon feta, li flimkien jagħmlu ikla kompleta fi ftit minuti biss. Jekk ma tiggustax il-ħaruf tista’ tuża ċ-ċanga.

Ħin: 30 minuta

Isservi: 4 persuni

Ingredjenti:

  • 175 g ikkapuljat tal-ħaruf
  • Mgħarfa u nofs żejt taż-żebbuġa
  • Basla kbira, imqattgħa rqiq
  • 3 sinniet tewm, imqatta’ rqiq
  • Kuċċarina trab tal-kannella (cinnamon)
  • ½ kuċċarina klin (rosemary) imnixxef
  • ½ kuċċarina origanu imnixxef
  • 400 g polpa tat-tadam
  • 2 imgħaref żebbuġ iswed mingħajr għadma, imqatta’
  • Melħ u bżar mitħun frisk
  • 350 g għaġin xgħir
  • ¼ kikkra ġobon feta, imfarrak

Tħejjija:

  1. Poġġi borma kbira bl-ilma bil-melħ fuq nar għoli biex tagħli.
  2. Saħħan taġen żgħir u sajjar l-ikkapuljat sakemm jieħu l-kulur, madwar 4 minuti. Aqleb l-ikkapuljat f’passatur u ħallih joqtor fuq skutella.
  3. Saħħan iż-żejt f’taġen kbir u fond fuq nar moderat u żid il-basla. Qalli għal 5 minuti jew sakemm tirtab, imbagħad żid it-tewm, it-trab tal-kannella, il-klin u l-origanu u qalli għal minuta oħra. Żid il-ħaruf.
  4. Ferra’ l-polpa tat-tadam u tektek għal 10 minuti jew sakemm iz-zalza tibda tinġibed, filwaqt li tħawwad kull tant ħin. Neħħi minn fuq in-nar u żid iż-żebbuġ, melħ u bżar.
  5. Sadanittant għalli l-għaġin xgħir għal madwar 8 minuti, jew skont l-istruzzjonijiet tal-pakkett. Saffih mill-ilma u ħalltu maz-zalza fit-taġen.
  6. Servih sħun bil-ġobon feta mfarrak fil-wiċċ.

Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.

Would you like to read this recipe in English? Let us know in the comments section below!