Naħseb li l-aktar togħma favorita u popolari fil-ħelu hija ċ-ċikkulata. Din hija riċetta ta’ gallettini bil-krema tal-menta. Tista’ żżommhom f’kontenitur magħluq sew għal jumejn; dejjem jekk jirnexilek tirreżisti li ma tikolhomx kollha f’daqqa!
Ħin: 35 minuta, u ħin biex tkessaħ
Kwantità: 10
Ingredjenti:
Għall-gallettini:
- 250 g dqiq
- 150 g zokkor tal-ħelu (icing sugar)
- 50 g kawkaw
- 225 g butir kiesaħ, imqatta’ dadi
- Niskata melħ
- Isfar ta’ bajda
Għall-krema tan-nofs:
- 175 g ċikkulata skura
- 150 ml krema doppja
- ½ kuċċarina essenza tal-menta
Tħejjija:
- Fi skutella kbira għarbel id-dqiq u żid miegħu il-butir. Daħħal il-butir fid-dqiq bil-ponot ta’ subgħajk (rub in) sakemm isiru qishom frak tal-ħobż.
- Fuq din it-taħlita għarbel iz-zokkor tal-ġelu u l-kawkaw, u ħallat kollox sew flimkien.
- Żid l-isfar tal-bajda u ħawwad sakemm it-taħlita tibda tagħqad, imbagħad tellagħha fuq il-mejda u agħġinha ftit sakemm tillixxa.
- Geżwer l-għaġina f’borża u poġġiha fil-friġġ għal nofs siegħa.
- Saħħan il-forn għal temperatura ta’ 180°C. Iksi tilar bil-kartaforn.
- Iftaħ l-għaġina għal ħxuna ta’ 5 mm u aqta’ fi ċrieki ta’ 5 ċm dijametru; toħroġ madwar 20. Poġġi ċ-ċrieki fuq it-tilar u aħmi għal 10-12-il minuta.
- Ħalli l-gallettini jibirdu fit-tilar stess qabel tpoġġihom biex jiksħu fuq gradilja. Sadanittant, ipprepara l-krema għan-nofs.
- Saħħan iċ-ċikkulata banjumarija sakemm tinħall, imbagħad żid il-krema u l-essenza u ħawwad sakemm jitħalltu kompletament. Ħalli t-taħlita tibred ftit.
- Idlek ftit krema taċ-ċikkulata fuq gallettina u agħlaq b’galletina oħra. Kompli sakemm tuża l-gallettini kollha.
Ippruvajtha din ir-riċetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.
Would you like to read this recipe in English? Let us know in the comments section below!
