Iz-zalza tal-ġbejniet li takkumpanja lil dan il-platt sempliċi ta’ flett taċ-ċanga bil-pitravi hija ideali għax tagħti dik it-togħma kemm kemm qarsa taċ-ċitru li tikkuntrasta ma’ dik ħelwa tal-pitravi mixwija.
Ħin totali: sagħtejn u 10 minuti
Isservi: 4 persuni
Ingredjenti:
- 3 pitraviet kbar, maħsulin
- 1 kg flett taċ-ċanga
- 150 ml żejt taż-żebbuġa extra verġni
- 2 basliet ħomor, maqtugħin roti ta’ 5mm ħxuna
- 2 sinniet tewm, imqattgħin
- 2 mgħaref weraq tas-sagħtar, imqatta’
- 100 ml ħall tal-inbid
- Mgħarfa mustarda taż-żerriegħa (wholegrain)
- Melħ u bżar mitħun frisk
- 2 kikkri insalata jew weraq tal-gosti tiegħek
Għaz-zalza tal-ġbejniet:
- 150 g ġbejniet friski
- 2 kuċċarini ħall tal-inbid abjad
- Kuċċarina qxur tal-lumi, maħkuk irqiq
- Kuċċarina meraq tal-lumi
- Mgħarfa tursin frisk, imqatta’
Tħejjija:
- Saħħan il-forn għal temperatura ta’ 200°C.
- Geżwer kull pitrava fil-foil u aħmihom għal siegħa jew sakemm jirtabu. Kif jibirdu qaxxarhom u qattagħhom roti ta’ 5 mm ħxuna.
- Roxx il-flett bil-melħ u l-bżar. Saħħan mgħarfa żejt taż-żebbuġa f’taġen kbir fuq nar moderat u xawwat il-flett mid-dawra kollha sakemm jieħu kulur kannella minn kullimkien, madwar 3-4 minuti.
- Poġġi l-basal u t-tewm f’dixx tal-forn u roxx bi ftit żejt, bżar u melħ. Poġġi l-flett fuq il-basal u ferrex fuqu l-weraq tas-sagħtar.
- Ixwi fil-forn għal 25 minuta biex jibqa’ ħamrani minn ġewwa. Dewmu għal aktar ħin fil-forn jekk tridu msajjar aktar.
- Poġġi l-flett fuq platt, għattih bil-foil u ħallih joqgħod għal 10 minuti.
- Tella’ l-basal u t-tewm minn ġod-dixx mingħajr ma’ tkisser ir-roti tal-basal. Neħħi l-likwidu li jkun ħareġ mil-laħam, żidu ftit melħ u bżar u ħallat nofsu mal-pitravi.
- Biex tagħmel iz-zalza tal-ġbejniet: ħabbat l-ingredjenti kollha flimkien sakemm ikollok taħlita lixxa. Jekk tixtieq iz-zalza aktar immerrqa, żidha ftit ilma fietel. Żid melħ u bżar kemm tiggosta.
- Biex isservi: qatta’ l-flett f’biċċċiet ta’2 ċm ħxuna. Fuq kull platt poġġi rota pitravi, imbagħad fuqha poġġi biċċa flett, basal u ħaxix. Irrepeti s-saffi u fl-aħħar ferra’ z-zalza fil-wiċċ.
Għoġbitek din ir-riċetta? Għidilna billi tħalli l-kummenti tiegħek hawn taħt u agħmel ir-rating tiegħek u share biex inkomplu nwasslulek aktar riċetti li jogħġbuk.
If you want to read this in English, do let us know and we'll have it translated for you.
