Fi żmien il-pitravi żgur li tkun tixtieq tgawdihom kemm tista', imma forsi tintilef meta tieqaf u taħseb x'se tagħmel bihom. Din ir-riċetta tad-dipp tal-pitravi bil-jogurt tħallat il-kemmun u t-tamal biex toħloq togħma li xxaqleb lejn l-orjent. Flok ġulepp tat-tamal tista' tuża wkoll l-agave nectar jew il-maple syrup. 

Isservi: 6

Enerġija: 200 kalorija

Ingredjenti:

• 700 g pitravi mixwijin
• 2 sinniet tewm, maħkuk
• Kuċċarina żrieragħ tal-kemmun (caraway jew cumin seeds) mitħunin
• 1/4 ta' kuċċarina cayenne jew skont il-gosti
• Kikkra jogurt plain 
• Mgħarfa ġulepp tat-tamal (date syrup)
• 3 imgħaref żejt taż-żebbuġa 
• Melħ skont il-gosti
• Ponn lewż imqatta' u mixwi, għat-tiżjin

Servi mal-ħobż bla ħmira (pitta)

Tħejjija:

1. Qaxxar il-pitravi u qatta' fi flieli. 
2. Ġo blender itfa' t-tewm u l-pitravi u ħawwad sew.
3. Żid il-jogurt u ħawwad sakemm ikollok purè.
4. Żid il-ġulepp, iż-żejt taż-żebbuġa, il-kemmun, il-cayenne u l-melħ, u ħawwad sew.
5. Poġġi ġo skutella kbira, raxxax ftit żejt taż-żebbuġa u l-lewż. Servi mal-pitta.

Dan id-dipp iżomm jumejn fil-friġġ.