Għalina l-Maltin, il-patata hija parti integrali mid-dieta u l-platti tagħna. Nistgħu ngħidu li ma kull platt inservu xi tip ta’ patata: maxx, chips, il-forn, eċċ. Din hija riċetta ta’ patata moħmija ftit differenti minn tas-soltu b’dip imħawwar li jakkumpanjaha.
Preparazzjoni: 45 minuta
Ħin totali: 3 sigħat
Isservi: 4 persuni
Ingredjenti:
- 750 g patata żgħira ta’ daqs wieħed, maħsula
- 60 ml żejt taż-żebbuġa
- 2 imgħaref tursin frisk, imqatta’
- 2 imgħaref nagħniegħ frisk, imqatta’
- Melħ u bżar mitħun frisk
Għall-krema tal-lumi:
- 200 g krema qarsa (tista’ tuża wkoll jogurt naturali)
- 2 imgħaref kurrat selvaġġ (chives), imqatta’
- Mgħarfa nagħniegħ frisk, imaqtta’
- Mgħarfa kosbor frisk, imqatta’ (tista tuża wkoll tursin frisk)
- Sinna tewm, misħuqa
- Mgħarfa meraq tal-lumi
Tħejjija:
- Poġġi l-patata f’kazzola u għattiha bl-ilma. Poġġiha fuq nar għoli u, kif tiftaħ tagħli, baxxi ftit in-nar u ħalliha ssir mgħottija għal 25 minuta jew sakemm tirtab. Saffi l-patata mill-ilma u ħalliha toqtor fuq sarvetta nadifa skakemm tinxef
- Idlek tilar bi ftit żejt. Poġġi l-patata fuq it-tilar, u b’masher ifqa’ l-patata biex tiċċattjaha ftit. Poġġi t-tilar fil-friġġ għal siegħa jew aktar, sakemm il-patata tiksaħ sew.
- Sadanittant għamel il-krema tal-lumi. Poġġi l-ingredjenti kollha fi skutella u ħallat kollox sew flimkien. Għatti l-iskutella u poġġiha fil-friġġ biex tiksaħ.
- Saħħan il-forn għal temperatura ta’ 200°C.
- Roxx il-patata biż-żejt u aqlibha biex tinkesa kompletament.
- Aħmi għal 20 minuta, imbagħad aqleb il-patata fuq il-wiċċ l-ieħor u kompli aħmi għal 15-il minuta oħra jew sakemm tara li ħmaret. Roxx bil-melħ u bżar mitħun frisk, u bil-ħxejjex aromatiċi.
- Servi l-patata sħuna mal-krema tal-lumi.
Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.
Would you like to read this recipe in English? Let us know in the comments section below!
