Vera li llum issib il-kumdità tal-instant fil-pakketti, iżda hemm min jibqa' jsostni li m'hemmx itjeb minn dak li tħejji b'ingredjenti naturali u friski mill-bidu nett, u tista' wkoll tifhem għaliex jgħidu hekk. Ipprova din ir-riċetta tal-custard mill-bidu nett u għidilna x'jidhirlek. Parir żgħir: Biex il-custard ma jrabbix il-qoxra hu u jibred, għatti l-iskutella bil-clingfilm.
Isservi: 4
Tagħmel: 2 kikkri
Ingredjenti:
- 350 ml ħalib
- 10 ml (2 kuċċarini) cornstarch
- 15 ml (mgħarfa) zokkor
- 3 isfra tal-bajd
- 2.5 ml (1/2 kuċċarina) essenza tal-vanilja
Tħejjija:
- Ħawwad 2 imgħaref ħalib mal-cornstarch ġo kazzola bil-qiegħ oħxon.
- Meta l-cornstarch jinħall, żid il-kumplament tal-ħalib u z-zokkor, u sajjar fuq nar medju sakemm jibda jagħqad imbagħad jagħli. Neħħi minn fuq in-nar.
- Ħabbat l-isfar tal-bajd b'furketta ġo skutella żgħira.
- Itfa' kikkra mit-taħlita mal-isfar tal-bajd, u ħabbat bis-saħħa int u tferragħha.
- Itfa' l-kontenut tal-iskutella ġol-kazzola, u ibqa' ħawwad sakemm jagħli.
- Neħħi minn fuq in-nar u żid l-essenza tal-vanilja mat-taħlita.
- Poġġi l-custard ġo skutella jew buqar.
Għoġbitek din ir-riċetta? Għidilna x'taħseb billi tħalli kumment hawn taħt u jekk jogħġbok agħmel like u share biex inkomplu nwasslulek riċetti li jogħġbuk.