Il-cupcakes huma l-ħelu li jiġġennu warajh kemm it-tfal u kemm il-kbar. It-taħlita tal-cupcakes hija waħda sempliċi bħal dik tal-kejkijiet, imma l-forom żgħar tagħhom u t-tiżjin ta’ fuqhom jagħmluhom attraenti wisq. 

Ħin: 30 minuta

Kwantità: 14

Ingredjenti:

Għall-cupcakes:

• 125 g dqiq self-raising, mgħarbul
• ½ kuċċarina trab tal-ħami (baking powder)
• 125 g butir, temperatura tal-kamra
• 125 g zokkor fin (caster sugar)
• 2 bajdiet, imħabbtin ħafif
• 2 imgħaref ħalib
• Qoxra maħkuka rqiq ta’ lumija
• Mgħarfa meraq tal-lumi

Għall-krema:

• 125 g butir, temperatura tal-kamra
• 250 g zokkor tal-ġelu (icing sugar), mgħarbul
• Qoxra ta’ nofs lumija maħkuka rqiq
• Mgħarfa meraq tal-lumi
• Flieli żgħar u rqaq tal-lumi, biex iżżejjen

Tħejjija:

1. Saħħan il-forn għal temperatura ta’ 180°C. Imla landa tal-muffins (bun tin) ta’ tnax bil-forom tal-karti.
2. Biex tagħmel it-taħlita tal-kejk:
   1. Ħabbat il-butir u z-zokkor fin sakemm ikollok taħlita ħafifa.
   2. Żid il-bajd u mgħarfa mid-dqiq u kompli ħabbat.
   3. Fl-aħħar żid ukoll il-meraq u l-qoxra maħkuka tal-lumija.
   4. Daħħal il-kumplament tad-dqiq u t-trab tal-ħami bil-mod fit-taħlita u żid ukoll il-ħalib.
3. Qassam it-taħlita bejn il-forom tal-karti u aħmi għal 10-15-il minuta jew sakemm stikka li ddaħħal f’nofs waħda minnhom toħroġ nadifa.
4. Oħroġ il-cupcakes fuq gradilja biex jibirdu sew.
5. Sadanittant ipprepara l-krema:
   1. Ħabbat flimkien il-butir u z-zokkor tal-ġelu sakemm ikollok taħlita lixxa u ħafifa.
   2. Żid il-meraq u l-qoxra maħkuka tal-lumi u ħallat kollox sew.
6. Meta l-cupcakes ikunu kesħu sew, żejjen bil-krema billi tidlikha fuq il-wiċċ jew timla piping bag bil-krema u toħloq disinn. Poġġi flieli rqaq tal-lumi fuq il-krema u servi.

Ippruvajtha din ir-riċetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.

Would you like to read this recipe in English? Let us know in the comments section below!