Riċetta: Cupcakes bl-ilwien tal-qawsalla

Rainbow cupcakes Cupcakes bl-ilwien tal-qawsalla

Read this recipe in English: Rainbow cupcakes

Il-karnival huwa festa ta’ kuluri bħalma huma dawn il-cupcakes bl-ilwien tal-qawsalla. Għalkemm ir-riċetta hija sempliċi, joħdulek biss ftit ħin aktar biex tħallat il-kulur u tqasam. Però, fl-aħħar ir-riżultat ikun sabiħ ferm, u żgur jieħdu pjaċir bihom kemm it-tfal u kemm il-kbar. Tista’ tkompli żżejjinhom billi tiksi l-wiċċ bil-krema jew ġelu u troxx jew twaħħal ħelu kkulurit.

Ħin: 45 minuta

Kwantità: 12

Ingredjenti:

  • 125 g zokkor fin (caster sugar)
  • 125 g butir
  • 2 bajdiet
  • 125 g dqiq self-raising
  • Kuċċarina essenza tal-vanilla
  • 3 imgħaref ħalib
  • 4 fliexken kulur tal-ikel: aħmar, blu, isfar u aħdar
  • Krema mħabbta biex iżżejjen
  • Vermiċelli tal-ħelu kkuluriti

Tħejjija:

  1. Saħħan il-forn għal temperatura ta’ 200°C. Iksi landa ta’ 12-il cupcake bil-forom tal-karti.
  2. Ħabbat flimkien iz-zokkor u l-butir sakemm ikollok taħlita ħafifa u ċara fil-kulur.
  3. Żid il-bajd waħda waħda flimkien ma’ ftit dqiq kull darba u ħabbat bejn kull waħda.
  4. Żid l-essenza tal-vanilla u ħawwad, imbagħad żid il-ħalib ftit ftit.
  5. Aqsam it-taħlita indaqs bejn 6 bwieqi u żid:
    • F’bieqja 1, nofs tapp kulur aħmar
    • F’bieqja 2, nofs tapp kulur aħmar u nofs tapp kulur isfar biex tagħmel oranġjo
    • F’bieqja 3, nofs tapp kulur isfar
    • F’bieqja 4, nofs tapp kulur aħdar
    • F’bieqja 5, nofs tapp kulur blu
    • F’bieqja 6, nofs tapp kulur blu u nofs tapp kulur aħmar biex tagħmel vjola
  6. Ħawwad il-kulur mat-taħlita f’kull bieqja.
  7. Qassam il-kulur vjola fit-12-il forma tal-karti u rrepeti bil-kuluri l-oħra f’din l-ordni: blu, aħdar, isfar, oranġjo, aħmar.
  8. Aħmi għal 10-20 minuta.
  9. Żejjen il-wiċċ bi-krema mħabbta u roxx bil-vermiċelli kkuluriti

Ippruvajtha din ir-riċetta? Għoġbitek? Għidilna billi tħalli kumment u r-rating tiegħek hawn taħt u agħfas share.