Nirrakkomandalek li tirdoppja l-kwantità mill-ewwel meta tagħmel dawn il-cookies irreżistibbli, għax ma tantx se jdumu fil-landa tal-gallettini. Biċ-ċikkulata u l-ġinġer flimkien, ir-riżultat joħroġ tajjeb żgur.
Dawn il-cookies tista’ tiffriżahom moħmijin. Kemm tniżżlilhom il-friża u troxx fuqhom iċ-ċikkulata mdewba.
Kwantità: 18-il cookie
Ingredjenti:
- 100 g butir mingħajr melħ, artab
- 100 g zokkor fin (caster sugar)
- Bajda
- 50 g cikkulata Bournville, imdewba
- 175 g dqiq
- 3 biċċiet ġinġer ippriservat, imqatta’
- 50 g ċikkulata Bournville, għad-dekorazzjoni
Tħejjija:
- Saħħan il-forn għal temperatura ta’ 180°C. Idlek żewġ tilari bi ftit butir imdewweb.
- Ħabbat flimkien il-butir u z-zokkor sakemm isiru bħal krema ħafifa.
- Żid il-bajda u ċ-ċikkulata u kompli ħabbat kollox flimkien.
- Fit-taħlita daħħal bil-mod id-dqiq u l-biċċiet tal-ġinġer.
- Poġġi t-taħlita mgħarfa mgħarfa fuq it-tilari bi ftit spazju bejn waħda u oħra. Agħfas bil-wara ta’ furketta biex tiċċatjahom ftit. Aħmi għal 10-15-il minututa sakemm jieħdu kulur kannella dehbi. Berridhom fuq gradilja.
- Żejjen billi troxx biċ-ċikkutata mdewba.
Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.
Would you like to read this recipe in English? Let us know in the comments section below!
