Iċ-ċikwejra hija bħal kaboċċa bil-weraq ħomor b'vini bojod. Għandha togħma morra u qawwija li tonqos meta tixwiha. Meta ssajjarha, xi ftit tal-ħlewwa toħroġ, imma t-togħma l-aktar dominanti tibqa' dik morra.
Iz-zalza tal-ġewż u l-inċova tikkumplimenta ħafna liċ-ċikwejra għax l-imluħa tal-inċova, it-togħma qawwija tat-tewm u dik tal-ġewż, li lkoll għandhom xi ftit togħma ta' mrar fihom, imorru tajjeb flimkien. Jekk se tferra' z-zalza fuq iċ-ċikwejra, trid isserviha mill-ewwel għax, aktar ma toqgħod, iz-zalza aktar tagħqad. Mod ieħor biex isservi z-zalza jekk din tkun laħqet qagħdet u għaqdet hu li sserviha fi bwieqi ċkejknin u tbill iċ-ċikwejra fiha.
Ħin: 20-30 minuta
Ingredjenti
Għal 6 persuni
- 3 biċċiet inċova
- 7 mgħaref żejt taż-żebbuġa ekstra verġni
- 1 mgħarfa żejt tal-ġewż
- 2 sinniet tewm, misħuqin
- 1 mgħarfa meraq tal-lumi jew ħall tax-sherry
- 1 kuċċarina mustarda Dijon
- 40g ġewż, imfarrak
- Bżar mitħun frisk
- 2 ċikwejriet kbar jew 4-6 ta' daqs medju, maqsumin flieli għat-tul, 4-5ċm ħxuna
- Melħ
Biex tagħmel iz-zalza:
- Laħlaħ l-inċova u qattagħha.
- Saħħan 2 mgħaref żejt taż-żebbuġa f'taġen żgħir fuq nar baxx u żid l-inċova u t-tewm. Tektek u ħawwad sakemm it-tewm jirtab u l-inċova titkisser.
- Poġġi t-taħlita f'mehrież (mortar) u itħan bil-lida (pestle) sakemm tagħmel paste.
- Żid il-meraq tal-lumi jew ħall fit-taġen u, b'mgħarfa tal-injam, laqqat u aqla' l-fdalijiet tat-taġen, imbagħad ferrgħu fil-mehrież.
- Żid il-mustarda u għaffeġ. Bil-mod żid 3 mgħaref żejt taż-żebbuġa u ż-żejt tal-ġewż; bejn mgħarfa u oħra daħħal iż-żejt sewwa fit-taħlita.
- Żid il-ġewż u isħqu fit-taħlita sakemm iz-zalza tiġi magħquda. Żid melħ u bżar kemm tiggosta (ftakar li l-inċova diġà mielħa).
Biex tipprepara ċ-ċikwejra:
-
Poġġi ċ-ċikwejra f’bieqja u dawwarha fiż-żejt li jkun fadal.
- Saħħan taġen b'qiegħ oħxon u ixwi ċ-ċikwejra sakemm tibda tieħu l-kulur u tinħaraq f'xi bnadi. Aqleb sikwit. Ixwi ċ-ċikwejra ftit ftit.
- Poġġi ċ-ċikwejra fuq platt li sservi fih, jew platti individwali. Tista' sservi ċ-ċikwejra sħuna jew f'temperatura tal-kamra, biz-zalza maħlula fuqha jew biz-zalza fi bwieqi żgħar.
Informazzjoni nuttrittiva għal kull porzjon: 230 kalorija; 23g xaħam; 3g xaħam saturizzat; 7g xaħam poli mhux saturizzat; 13g xaħam mono mhux saturizzat; 2mg kolesterol; 5g karboidrati; 1g fibra tad-dieta; 108mg sodju (ma jinkludix il-melħ miżjud għat-togħma); 3g proteina.
