Riċetta: Chutney tal-qargħa ħamra

Recipe Pumpkin chutney Riċetta: Chutney tal-qargħa ħamra

Iċ-chutney huwa taħlita ta’ ħaxix u frott imħawwar bi ħwawar diversi. Tista’ tagħmel kwantità meta l-prodott ikun fl-istaġun biex tibbottiljah u terfgħu għal meta ma ssibx.

Ħin: 55 minuta

Tagħmel: 4-5 vażetti ta’ 250g

 

Ingredjenti:

  • 600g qargħa ħamra, imqattgħa dadi żgħar
  • 2 tuffiħat, imqaxxrin u mqattgħin dadi żgħar
  • 1 bżaru aħmar (capiscum), imnaddaf u mqatta’ biċċiet żgħar
  • 1 bżaru aħdar (capiscum), imnaddaf u mqatta’ biċċiet żgħar
  • 150g zokkor
  • 80ml ħall tas-sidru (cider vinegar)
  • 2 basliet, imqattgħin irqiq
  • Biċċa ġinġer frisk, imqatta’ rqiq
  • 100g żbib
  • 1bastun tal-kannella
  • Melħ u bżar mitħun frisk

 

Metodu:

  1. Poġġi z-zokkor u l-ħall tas-sidru f’kazzola kbira, poggihom fuq nar medju sakemm jiftħu jagħlu. Baxxi n-nar u ħawwad sakemm jinħall iz-zokkor, imbagħad żid il-basal u l-bastun tal-kannella.
  2. Wara 5 minuti żid il-qargħa ħamra, il-bżar, it-tuffieħ u ż-żbib. Ħalli t-taħlita tiftaħ tagħli, imbagħad tektek sakemm tagħqad. It-tuffieħ ikun inħall u l-qargħa ħamra rtabet. Żid il-melħ u l-bżar u ħawwad.
  3. Ħalli ċ-chutney tibred imbagħad poġġiha f’vażetti sterilizzati (biex tisterilizza l-vażetti għallihom għal 10 minuti u ħallihom jinxfu naturali, jew poġġihom f’forn jaħraq għal 10 minuti). Issiġilla l-vażetti u poġġihom fil-friġġ.
  4. Ħalli ċ-chutney jimmatura għal-gimgħa qabel tużah.

 
Ippruvajt din ir-riċetta?  Kif sibtha? Għidilna billi tħalli kumment jew ir-rating hawn taħt u agħfas share.