Riċetta: Chutney tal-cranberries u t-tin

Riċetta: Chutney tal-cranberries u t-tin

Fuq il-mejda tal-ikel tal-Milied insibu wkoll iz-zalza tal-cranberries li hija akkumpanjament tajjeb għal mad-dundjan. Hawn min isibha qawwija wisq it-togħma tal-cranberries waħedhom u għalhekk din iċ-chutney ssolvi l-problema għax hija taħlita ta’ cranberries u tin, li jagħti togħma aktar ħelwa. Tista’ tisserva kemm mad-dundjan kif ukoll mal-majjal, papra u tiġieġ.

Ingredjent

Għal madwar 2 kikkri

  • 18-il tina mqadda, imqattgħin
  • ½ kikkra nbid port
  • 350g cranberries friski jew iffriżati
  • ½ kikkra zokkor muscovado
  • 1 mgħarfa ġinġer frisk, maħkuk
  • Qoxra maħkuka u meraq ta’ nofs larinġa
  • Melħ u bżar mitħun frisk
  • 1 kuċċarina klin, imqatta’

 

Metodu

  1. Poġġi t-tin f’bieqja u ferra’ fuqu l-inbid port. Ħallih jixxarrab għal 30 minuta.
  2. F’kazzola ħallat il-cranberries u z-zokkor muscovado u poġġihom fuq nar medju sakemm jinħall iz-zokkor.
  3. Żid it-tin u l-port, il-qoxra u meraq tal-larinġa, il-ġinġer, il-klin, u melħ u bżar. Meta t-taħlita tiftaħ tagħli, baxxi n-nar u ħalliha ttektek mikxufa, filwaqt li tħawwadha kultant, għal 20 minuta.
  4. Neħħi minn fuq in-nar u poġġiha f’bieqja tal-ħġieġ. Ħalli ċ-chutney tibred kompletament. Tista’ tipprepara ċ-chutney jumejn qabel u żżommha fil-friġġ. Oħroġha qabel biex tilħaq tiġi għal temperatura tal-kamra qabel isserviha.