Għalkemm ħobż ta’ kull kwalità nsibu nixtruh minn kullimkien, li tagħmel ħobż differenti int id-dar huwa ta’ sodisfazzjon kbir, u timla wkoll id-dar b’riħa tfuħ li taqsamlek qabek.
Preparazzjoni: 30 minuta
Ħin totali: siegħa u ħames minuti
Isservi: 8 persuni
Ingredjenti:
- 2½ kuċċarini għasel
- 310 ml ilma fietel
- 2 kuċċarini (14 g) ħmira mnixxfa
- 50 g butir, imdewweb
- 300 g dqiq plain
- 215 g dqiq ismar (wholemeal)
- Kuċċarina melħ
- 230 g nofsijiet tal-ġewż, inkaljati ħafif u mqattgħin irqiq
- Żejt taż-żebbuġa, biex tidlek
- Ħalib, biex tidlek
Tħejjija:
- Fi skutella żgħira ħallat flimkien l-għasel u 125 ml mill-ilma. Roxx il-ħmira fuq il-likwidu u ħalliha toqgħod għal madwar 8 minuti sakemm tibda’ tirgħa. Ferra’ t-taħlita fi skutella kbira u żid il-butir u l-kumplament tal-ilma.
- Għarbel id-dqiq abjad u ismar flimkien mal-melħ u żid il-ġewż. Żidhom mat-taħlita tal-ħmira u b’mgħarfa tal-injam ħawwad kollox flimkien, imbagħad kompli għaqqad b’idejk fl-iskutella stess.
- Roxx il-mejda bi ftit dqiq, tella’ l-għaġina mill-iskutella u agħġinha sakemm issir lixxa u tiġġebbed.
- Idlek skutella kbira biż-żejt, poġġi l-għaġina u dawwarha biex tinkesa biż-żejt. Għatti l-iskutella bil-cling film u ħalliha f’post għas-sħana għal siegħa u 45 minuta jew sakemm tirdoppja fid-daqs.
- Niżżel in-nofs tal-għaġina bil-ponn ta’ jdejk, oħroġha mill-iskutella u aqsamha min-nofs. Ifforma kull biċċa f’bezzun ta’ 35 ċm.
- Saħħan il-forn għal temperatura ta’ 180°C.
- Idlek tilar kbir biż-żejt u poġġi l-bziezen fuqu; għattihom b’sarvetta nadifa u ħallihom f’post sħun għal siegħa.
- Bi mqass agħti sitt talli djagonali fuq il-wiċċ ta’ kull bezzun u idlikhom bil-ħalib.
- Aħmi għal 35 minuta jew sakemm il-bziezen jiħmaru u jinstemgħu vojta meta ttaptap fuq il-qigħan tagħhom. Poġġihom fuq gradilja biex jibirdu.
Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.