Riċetta: Brussels sprouts bil-bacon u qastan

Riċetta: Brussels sprouts bil-bacon u qastan

Il-Brussels sprouts huma komuni bħala akkumpanjament mal-ikla tal-Milied, għalkemm ftit naf nies li jippreferu dan il-ħaxix. Ngħid għalija, anke mgħollijin biss inħobbhom, imma jien waħda mill-ftit li jħobbu l-ħaxix, ikun kif ikun. Għal min ma jħobbx it-togħma ta’ ħaxix waħdu, din ir-riċetta fiha wkoll il-bacon u l-qastan li żgur jagħtu togħma differenti lill-Brussels sprouts.

Ingredjenti

Għal 8 persuni

  • 250g bacon taż-żaqq, imqatta’
  • 60g butir
  • 2 sinniet tewm, misħuqin
  • 120g frak tal-ħobż frisk
  • 1kg Brussels sprouts, imnaddfin
  • 200g qastan imqaxxar, imqatta’

Metodu

  1. Saħħan kazzola fuq nar medju u ixwi l-bacon sakemm jieħu l-kulur. Neħħi l-bacon mill-kazzola, erġa’ poġġiha fuq in-nar u ħoll il-butir. Baxxi n-nar, żid it-tewm u qalli għal minuta, imbagħad żid il-frak tal-ħobż. Ħawwad għal madwar 5 minuti sakemm il-ħobż jixrob il-butir u jibda jieħi l-kulur. Neħħi minn fuq in-nar.
  2. Saħħan il-forn għal temperatura ta’ 180°C
  3. Poġġi l-Brussels sprouts f’kazzola u għatti bl-ilma. Għalli għal 4-6 minuti jew sakemm jibdew jirtabu imma ma jitgħaffġux. Saffi u ħallat mal-bacon u l-qastan. Poġġi t-taħlita f’dixx tal-forn midluk bil-butir u roxx fuqhom il-frak tal-ħobż bil-butir u t-tewm.
  4. Aħmi għal 10-12-il minuta jew sakemm il-wiċċ jieħu kulur ħamrani.
  5. Servi sħun ma’ dundjan, tiġieġ, majjal jew ċanga mixwija.

 
Ippruvajt din ir-riċetta?  Kif sibtha? Għidilna billi tħalli kumment jew ir-rating hawn taħt u agħfas share.