Riċetta: Brodu bit-tewm, qargħa u laħam tad-dundjan

Riċetta Brodu bit-tewm, qargħa u laħam tad-dundjan

Din ir-riċetta hija maħsuba biex tuża l-fdalijiet li jkun fadallek fil-friġġ wara l-Milied, u l-kumplament tal-ingredjenti ssibhom faċilment. Tista’ tagħmilha wkoll fil-verżjoni veġetarjana, mingħajr id-dundjan

 

Ħin: 45-60 minuta

 

Ingredjenti

Għal 4 persuni

  • 6 kikkri ilma
  • 10 sinniet tewm, misħuqin
  • Melħ
  • 1 werqa tar-rand
  • 2 friegħi sagħtar frisk jew ½ kuċċarina sagħtar niexef
  • 65g ross basmati, imlaħlaħ
  • 150g qargħa ħamra jew qarabagħli twil
  • ⅔ kikkra laħam tad-dundjan imqatta’
  • ¼ kikkra tursin frisk, imqatta’
  • 1 mgħarfa żejt taż-żebbuġa ekstra verġni
  • Bżar mitħun frisk

 

Metodu

  1. Ħallat l-ilma, it-tewm, il-melħ, il-werqa tar-rand u s-sagħtar f’kazzola jew borma u poġġiha fuq in-nar sakemm tiftaħ tagħli. Baxxi n-nar , għatti u tektek għal 30 minuta. Żid il-melħ jekk hemm bżonn. Jekk trid it-togħma toħroġ aktar qawwija kompli tektek għal 5-10 minuti oħra.
  2. B’mgħarfa mtaqqba tella’ t-tewm il-werqa tar-rand u s-sagħtar mill-brodu. Kif jerġa’ jibda jbaqbaq żid ir-ross u l-qargħa ħamra ( jekk se tuża qarabagħli żżidux għalissa). Għatti l-borma u tektek għal 10 minuti, jew sakemm isir ir-ross.
  3. Jekk qed tuża l-qarabagħli, żidu meta r-ross ikun irtab u kompli tektek għal 5-10 minuti oħra, sakemm jirtab imma ma jkunx tilef il-kulur. Żid it-tursin u d-dundjan u ħallihom fuq in-nar sakemm jerġa’ jisħon kollox. Żid bżar u melħ kemm tiggosta u servi.