Riċetta: Blalen tal-larinġ, coconut u cranberry

Riċetta: Blalen tal-larinġ, coconut u cranberry

Dawn il-blalen huma sempliċi biex tagħmilhom.  Inħobb ħafna mhux biss it-togħmiet tal-cranberry u l-ġewż tal-Indi (coconut) flimkien imma d-dehra tagħhom bil-kuluri mżewqa tiġi sabiħa ħafna.  Il-cranberry hija frotta niexfa assoċjata ħafna mal-Millied u għalhekk dawn huma ideali għall-istaġun.

Ingredjenti:

150 g dqiq
50 g zokkor
50g butir
2 bajdiet
25 g cranberries imqattgħin biċċiet żgħar
3 qatriet essenza tal-vanilja
Qoxra maħkuka ta' kwart ta' lumija
Qoxra maħkuka ta' kwart ta' larinġa
200 g ġewż tal-Indi, nofs għat-taħlita u nofs biex trembel il-blalen fih
Xi 20 cranberry biex iżżejjen il-wiċċ
Meraq ta' larinġa
Niskata melħ

Tħejjija:

Saħħan il-forn għal 160 °C.  Iksi d-dixx tal-forn bil-kartaforn. Uża mixer tal-elettriku biex tħallat il-butir u z-zokkor.  Żid il-bajd u l-essenza tal-vanilja, il-meraq tal-larinġ u l qoxra taċ-ċitru. Ħawwad sakemm it-taħlita tirtab.  Żid id-dqiq, ħawwad, u fl-aħħar żid nofs il-ġewża tal-Indi u ħaddem it-taħlita b'idejk. Sawwar blalen żgħar. Rembel il-blalen fin-nofs l-ieħor tal-ġewża tal-Indi.  Poġġihom fuq id-dixx u żejjen billi tagħfas il-cranberry fuq wiċċ kull ballun. Sajjar għal nofs siegħa.