Riċetta: ‘Meat balls’ mimlijin bil-ġobon feta

Riċetta: Blalen tal-laħam mimlijin bil-ġobon feta

Hekk kif taqsam dawn il-blalen taċ-ċanga u ħaruf issib is-sorpriża tal-ġobon feta fin-nofs. Dan it-tip ta’ ġobon aktar nassoċjawh ma’ insalati milli ma’ ikel xitwi bħalma huma dawn il-blalen fiz-zalza, imma l-palat kremuż u ftit mielaħ jagħmel id-differenza kollha f’dan il-platt stil Grieg.

Ħin totali: siegħa

Isservi: 4-5 persuni

Ingredjenti:

  • 2 bajdiet
  • Kikkra frak tal-ħobż irqiq
  • ¼ kikkra żebbuġ aħdar, mingħajr għadma u mqatta’ rqiq
  • ¼ kikkra żebbuġ iswed, mingħajr għadma u mqatta’ rqiq
  • ⅓ kikkra tursin frisk, imqatta’
  • 4 sinniet tewm, imqattgħin irqiq
  • Melħ u bżar mitħun frisk
  • 450 g ikapuljat taċ-ċanga
  • 450 g ikkapuljat tal-ħaruf
  • Mgħarfa żejt taż-żebbuġa
  • 180 g ġobon feta, imqatta’ f’20 dada ndaqs

 Għaz-zalza tat-tadam:

  • 1 basla, imqattgħa rqiq
  • 1 sinna tewm, imqattgħa rqiq
  • 1 mgħarfa żejt taż-żebbuġa
  • 500g polpa tat-tadam
  • 100ml inbid aħmar
  • 1 kuċċarina origanu mnixxef
  • ½ kuċċarina trab tal-kannella (cinnamon)

Tħejjija:

  1. Ġo skutella ħallat flimkien iċ-ċanga, il-ħaruf, il-bajd, il-frak tal-ħobż, iż-żebbuġ aħdar, iż-żebbuġ iswed, it-tursin, it-tewm, u melħ u bżar.
  2. Aqsam it-taħlita f’20 porzjon u fforma kull porzjon f’ballun.
  3. B’subgħak agħfas in-nofs biex tifforma toqba u fiha daħħal biċċa ġobon feta. Erġa’ agħlaq madwar il-ġobon kompletament biex tifforma ballun.
  4. Poġġi l-blalen ħdejn xulxin fuq tilar, għattihom u poġġihom fil-friġġ.
  5. Sadanittant agħmel iz-zalza. Saħħan iż-żejt taż-żebbuġa f’kazzola kbira fuq nar moderat.
  6. Żid il-basla u qalliha għal 3 minuti. Żid it-tewma u kompli qalli għal minuta oħra.
  7. Ferra’ l-inbid u ħallih jibda’ jagħli, imbagħad żid ukoll il-polpa tat-tadam, l-origanu u t-trab tal-kannella. Baxxi n-nar, għatti l-kazzola u tektek għal 15-il minuta.
  8. Sakemm tkun qed ittektek iz-zalza, saħħan iż-żejt taż-żebbuġa f’taġen kbir fuq nar moderat u aqli l-blalen minn kull naħa sakemm jiħmaru (jista’ jkun li jkollok taqsamhom f’darbtejn).
  9. Poġġi l-blalen fiz-zalza u kompli tektek għal 15-il minuta oħra, jew sakemm ikunu saru kompletament.
  10. Servi ma’ ħaxix mgħolli jew insalata, jew fuq l-ispagetti.

Għoġbitek din ir-riċetta? Għidilna billi tħalli l-kummenti tiegħek hawn taħt, u agħmel ir-rating tiegħek u share biex inkomplu nwasslulek aktar riċetti li jogħġbuk.

Let us know if you'd like this recipe in ENGLISH and we'll have it translated for you.