Minflok black forest gateau, bl-istess ingredjenti u togħmiet nistgħu nagħmlu wkoll il-cupcakes.
Ħin: siegħa
Kwantità: 12
Ingredjenti:
- 50 g ċikkulata skura
- 175 g butir, temperatura tal-kamra
- 175 g zokkor ismar
- 3 bajdiet, imħabbtin ħafif
- 175 g dqiq self-raising, mgħarbul
- ½ kuċċarina trab tal-ħami (baking powder)
- 2 imgħaref kawkaw (cocoa), mgħarbul
- 100 ml cherry brandy, jekk trid
- 280 ml krema tat-tħabbit (whipping cream)
- 50 g ċikkulata tal-ħalib, maħkuka
- Ċirasa friska
Tħejjija:
- Saħħan il-forn għal temperatura ta’ 180°C. Imla’ landa ta’ 12-il muffin bil-forom tal-karti.
- Dewweb iċ-ċikkulata skura banjumarija u ħalliha tibred.
- Sadanittant, ħabbat flimkien il-butir u z-zokkor sakemm ikollok taħlita ħafifa.
- Żid il-bajd ftit ftit ma’ mgħarfa mid-dqiq kull darba filwaqt li tkompli tħabbat.
- Daħħal bil-mod b’mgħarfa l-kumplament tad-dqiq, it-trab tal-ħami u l-kawkaw. Fl-aħħar żid ukoll iċ-ċikkulata maħlula.
- Qassam it-taħlita bejn it-12-il forma tal-karti.
- Aħmi għal 20-25 minuta jew sakemm stikka li ddaħħal f’nofs waħda minnhom toħroġ nadifa. Oħroġhom fuq gradilja biex jibirdu.
- Jekk se tuża ċ-cherry brandy, bi stikka taqqab 3 toqbiet fil-wiċċ ta’ kull cupcake u roxx madwar kuċċarina cherry brandy fuqhom.
- Ħabbat il-krema sakemm tieqaf u poġġiha f’piping bag b’ponta stilla. Iddekora l-wiċċ tal-cupcakes bil-krema. Roxx ftit ċikkulata maħkuka u poġġi ċirasa friska fuq kull waħda.
Ippruvajtha din ir-riċetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.
Would you like to read this recipe in English? Let us know in the comments section below!
