Read this in English: Recipe: Octopus Bavette
Għalkemm l-istaġun tal-qarnit f’Malta wasal biex jispiċċa, qarnit iffriżat jew impurtat insibu s-sena kollha. Dan il-platt bavette b’zalza tipikament Mediterranja għandu t-togħma friska tal-baħar.
Ħin: siegħa u għoxrin minuta, u ħin biex tberred
Isservi: 4 persuni
Ingredjenti:
- 400 g għaġin bavette (tista’ tuża wkoll linguine jew spagetti)
- Kilo qarnita mnaddfa mil-linka, iffriżata
- 150 ml żejt taż-żebbuġa
- 150 ml inbid abjad
- 4 tadamiet sodi żengulin, mingħajr żerriegħa u mqattgħin dadi żgħar
- 2 basliet imdaqqsin, imqattgħin irqiq
- 4 sinniet tewm, imqattgħin
- 2 mgħaref żebbuġ iswed imqatta’
- Bżaru filfel, mingħajr żerriegħa u mqatta’ rqiq
- Meraq ta’ nofs lumija
- Qoxra maħkuka ta’ nofs lumija
- Qoxra sħiħa ta’ nofs lumija
- Werqa tar-rand
- Weraq tan-nagħniegħ
- Tursin frisk imqatta’, biex isservi
Tħejjija:
- Poġġi l-qarnita ffriżata f’kazzola, għattiha bl-ilma u żid il-werqa tar-rand u l-qoxra sħiħa tal-lumi. Poġġi l-kazzola fuq nar għoli sakemm tiftaħ tagħli, imbagħad baxxi n-nar, għatti l-kazzola parzjalment u ħalliha ttektek għal 30-40 minuta. Ħalli l-qarnita tiksaħ sew fl-ilma stess, imbagħad saffiha, neħħilha l-munqar, eċċ., u qattagħha.
- F’borma kbira ilma jagħli bil-melħ sajjar il-bavette sakemm isir al dente.
- Sadanittant, f’taġen kbir saħħan iż-żejt taż-żebbuġa u qalli l-basla sakemm issir trasparenti, imbagħad żid it-tewm u qalli għal ftit ieħor. Żid il-qarnita, il-filfel, il-meraq u l-qoxra maħkuka tal-lumi. Ferra’ l-inbid u ħallih jisħon u jinxtorob ftit imbagħad żid iż-żebbuġ, in-nagħniegħ u t-tadam. Ħawwad sakemm jisħon kollox sew, mingħajr ma jitfarrak it-tadam.
- Saffi l-għaġin u żidu maz-zalza fit-taġen u ħawdu sew maz-zalza għal minuta.
- Servi fil-pront bit-tursin imqatta’ fil-wiċċ, u aktar żejt taż-żebbuġa jekk trid.
Ippruvajtha din ir-riċetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.
