Din ir-riċetta ta’ tiġieġa fil-forn hija r-raba’ minn ħames riċetti ħfief għall-menù ta’ matul il-ġimgħa. Jekk tiddeċiedi li tippruvahom kollha għandek issib għajnuna fil-lista għax-xirja fl-aħħar ta’ din is-sensiela.

Preparazzjoni: 10 minuti

Ħin totali: siegħa

Isservi: 4 persuni

Ingredjenti

• Tiġieġa sħiħa (1.5kg), imqattgħa fi 8 biċċiet u bl-isdra maqsumin min-nofs għall-wisa’
• 450g patata bajda ġdida, maqsuma min-nofs ( f’erba’ biċċiet jekk tkun kbira)
• 1 basla ħamra kbira, maqsuma fi 8 biċċiet
• 1 ras tewm, miftuħa u bil-qoxra
• 6 fergħat sagħtar
• 1 lumija, maqsuma f’erbgħa
• ¼ kikkra żejt taż-żebbuġa ekstra verġni
• 2 mgħaref ħall balsamiku
• Melħ oħxon u bżar mitħun frisk

Metodu

1. Saħħan il-forn għal temperatura ta’ 230°C.
2. Poġġi l-biċċiet tat-tiġieġa, il-patata, il-basla, it-tewm, is-sagħatar u l-lumi f’dixx ta’ 30ċm x 40ċm.
3. Ħabbat flimkieniż-żejt u l-ħall u roxx fuq kollox. Ħallat biex jinkesa kollox u roxx bil-melħ u l-bżar.
4. Dawwar il-biċċiet tat-tiġieġa bil-ġilda ’l fuq. Aħmi għal 50 minuta jew sakemm it-tiġieġa tiħmar u ssir minn ġewwa kompletament.

Ippruvajt din ir-riċetta?  Kif sibtha? Għidilna billi tħalli kumment jew ir-rating hawn taħt u agħfas share.