Ir-riċetta tal-Erbgħa: Risotto bil-kurrat (leek), piżelli u bacon

Ir-riċetta tal-Erbgħa: Risotto bil-kurrat, piżelli u bacon

Mill-kwantità ta’ din ir-riċetta jkollok biżżejjed ross biex tuża għar-riċetta tal-Ġimgħa. Din hija t-tielet riċetta minn sensiela ta’ ħames riċetti għal matul il-ġimgħa. Ara l-kumplament tar-riċetti u, jekk tiddeċiedi li tippruvahom, sib il-lista għax-xirja fl-aħħar tas-sensiela.

 

Preparazzjoni: 40 minuta

Ħin totali: 40 minuta

Isservi: 4 persuni

 

Ingredjenti

  • 2 kurratiet, il-parti l-bajda u ħadra ċara biss
  • 12-il kikkra brodu tat-tiġieġ
  • 4 listi bacon, imqattgħin mill-wisa’ fi strixxi
  • 2 ½ kikkri ross arborio
  • 1 kikkra nbid abjad (dry)
  • ¾ kikkra piżelli tal-friża
  • ½ kikkra ġobon Parmiġġan, u aktar biex isservi, maħkuk irqiq
  • 2 mgħaref meraq tal-lumi frisk
  • Melħ oħxon u bżar mitħun frisk

 

Metodu

  1. Aqsam il-kurrat għat-tul min-nofs, laħalħu sewwa u xxuttah, imbagħad qattgħu rqiq.
  2. Għalli l-brodu f’kazzola; baxxi n-nar biex ikompli jtektek bil-mod.
  3. Sadanittant, f’taġen kbir bil-ġenb għoli jew borma wiesgħa u baxxa, ixwi l-bacon fuq nar medju gaħl madwar 5 minuti filwaqt li tħawwad sakemm jieħu l-kulur imma ma jibbiesx.
  4. Żid il-kurrat u ħawwad sakemm jirtab.
  5. Għolli n-nar u żid ir-ross. Ħawwad għal minuta sakemm isir trasparenti fit-truf.
  6. Żid l-inbid u ħawwad sakemm jevapora.
  7. Żid kikkra brodu. Baxxi n-nar u kompli ħawwad sakemm jinxtorob il-likwidu.
  8. Irrepeti l-istess proċess li żżid il-brodu ftit ftit sakemm isir ir-ross u jkollu konsistenza kremuża. Jista’ jkun li ma tużax il-brodu kollu. Mal-aħħar kikkra brodu li żżid mar-ross, żid ukoll il-piżelli.
  9. Neħħi minn fuq in-nar u żid il-Parmiġġan. Ħawwad, għatti t-taġen u ħalli r-risotto joqgħod għal 2 minuti.
  10. Roxx il-melħ u l-bżar u żid il-meraq tal-lumi.
  11. Erfa’ nofs il-kwantità tar-risotto (madwar 4 kikkri) fil-friġġ għar-riċetta tal-Ġimgħa. Servi l-kumplament bil-ġobon Parmiġġan.

 Ippruvajt din ir-riċetta?  Kif sibtha? Għidilna billi tħalli kumment jew ir-rating hawn taħt u agħfas share.