Minflok zalza bl-ikkapuljat, ma’ dawn il-kannelloni qed inżidu t-tonn taż-żejt mat-taħlita tal-mili –irkotta u spinaċi – għal dixx kannelloni ftit differenti u aktar sajfi minn tas-soltu.
Ħin: siegħa u nofs
Isservi: 4 persuni
Ingredjenti:
- 16-il tubu tal-għaġina (kannelloni)
- 250 g spinaċi msajra u msaffija, jew spinaċi tal-friża bil-friża mniżżla u msaffija
- 2 bottijiet kbar jew 4 żgħar tonn taż-żejt, imsaffijin
- 400 g irkotta
- Qoxra maħkuka rqiq ta’ lumija
- Mgħarfa żejt taż-żebbuġa
- 75 g ġobon Parmiġġan, maħkuk
- Ponn weraq tal-ħabaq frisk, imqatta’
- 400 g polpa tat-tadam
- 400 g passata tat-tadam
- 2 basliet, imqattgħin irqiq
- 4 sinniet tewm, imqattgħin
- 100 g mozzarella maħkuka
Tħejjija:
- Saħħan iż-żejt taż-żebbuġa f’kazzola fuq nar moderat, żid il-basal u t-tewm u qalli sakemm jibdew jirtabu. Żid il-polpa u l-passata tat-tadam, melħ u bżar mitħun frisk u ħalli z-zalza tiftaħ tagħli. Għatti l-kazzola parzjalment, baxxi n-nar u ħalli z-zalza ttektek għal 20-30 minuta jew sakemm tara li nġibdet u bdiet tagħqad. Żid il-ħabaq u ħawwad.
- Saħħan il-forn għal temperatura ta’ 180°C. Idlek dixx ta’ 20 ċm x 30 ċm.
- Fi skutella ħallat sew flimkien l-irkotta, l-ispinaċi, it-tonn taż-żejt, il-qoxra tal-lumi, nofs il-ġobon Parmiġġan, u melħ u bżar. Imla t-tubi bit-taħlita.
- Ferra’ nofs iz-zalza fil-qiegħ tad-dixx u ppostja l-kannelloni mimlijin fiz-zalza. Ferra’ u ifrex il-kumplament taz-zalza fuq il-kannelloni u roxx il-mozarella u l-kumplament tal-ġobon Parmiġġan fuq kollox.
- Aħmi għal 35-40 minuta, jew sakemm jiħmar il-wiċċ.
