Ġeneralment fid-dieta Mediterranja, l-ikliet huma ppreparati mill-bidu nett u zokkor u ħelu huma kkonsmati f’ammonti iżgħar u bil-moderazzjoni. Dan ma jfissirx li inti għandek tagħmel jogurt tiegħek stess jew tixtri fażola niexfa u toqgħod ixxarrabha matul il-lejl kull darba li għandek bżonn xi ingredjent. Trid tibda tagħmel il-bidla bil-mod u ninkoraġġikom tipprovaw tużaw prodotti lokali għax ebda prodott ma jista’ jkun frisk daqs dak tal-lokal. Madanakollu nfakkarkom li l-katina tal-ikel tal-prodotti lokali l-biċċa kbira hija trasparenti.
U trasparenti x’jiġifieri? Mhux qiegħda ngħid li kull produttur lokali għandu l-aqwa ingredjenti, imma qiegħda nwasslilkom il-messaġġ li l-gżira tagħna hija żgħira, u faċli ħafna biex inkunu nafu minn fejn ġej il-prodott, kif trabbew il-bhejjem, kif ġie użat il-bexx, għax huwa faċli li nsibu s-sors minn fejn ġej, il-metodu tal-ipproċessar u kif ġie mqassam fil-ħwienet.
Għandi wkoll fiduċja kbira fix-xogħol u r-riċerka li ssir fir-Razzett tal-Gvern fl-Għammieri. Bħala paragun, din it- trasparenza mhux daqshekk faċli tiskopriha bil-prodotti friski li jkunu deħlin minn barra u f’dan il-każ għandna bżonn nafdaw dak li nisimgħu jew naqraw. Ukoll bid-distanzi li hawn, impossibbli li l-freskezza ta’ prodotti barranin tkun l-istess minbarra forsi jekk it-trasport ikun bl-ajru u f’dan il-każ il-prezz se jkun ħafna ogħla.
Il-bidla tagħna għal dieta Mediterranja għandha ssir gradwalment. Tridu tibdew bil-bidliet sempliċi, pereżempju l-fażola tal-bott tipprova tixtri dik li tkun b’ebda melħ miżjud. Laħlaħhom u żidhom mal-insalati jew sopop għal sors ta’ proteina u fl-istess ħin tkun qed iżżid il-fibra. Li tkun familjari mal-prinċipji ewlenin ta’ dieta Mediterranja huwa l-ewwel pass importanti għal din l-integrazzjoni ta’ stil ta’ ħajja ġdida, ħajja b’saħħa tajba, stil ta’ ħajja Mediterranja li għalina hija l-aktar mod ta’ eżistenza naturali hawnhekk fil-qalba tal-Mediterran. Ibda billi tieħu nota ta’ dak li tiekol kuljum. Minflok tiffoka fuq nutrijenti individwali bħal xaħam saturat, zokkor jew melħ, iffoka fuq l-ikel u t-tisjir b’ingredjenti friski, ingredjenti mhux ipproċessati biex tikseb stil ta’ ħajja u dieta Mediterranja.
U ftakar biex tgawdi l-ikliet tiegħek, qis l-ambjent naturali ta’ madwarna fejn kull filgħodu kif tqum tħoss li hija ġurnata ta’ ċelebrazzjoni, u minn ġurnata ta’ ċelebrazzjoni tgawdi ġimgħa, xahar u ħajja ta’ ċelebrazzjoni b’dak li hu sempliċi fil-ħajja, dak li jinsab madwarna diġà.
X'taħseb dwar dan l-artiklu? Għidilna billi tħalli kumment jew ir-rating hawn taħt u agħfas share.