Riċetta: Soppa tat-traħana u ħaxix

Puréed trahana and vegetable soup

It-traħana hija prodott li jittiekel fil-Greċja u l-Lvant tal-Mediterran, magħmul mill-qamħ bulgur, semolina, jew taħlita ta’ semolina u dqiq, miżjud il-ħalib għal traħana ħelwa, jew ħalib u jogurt għal traħana b’togħma aktar qarsa. Biex tagħmel it-traħana d-dar segwi din ir-riċetta, imbagħad kompli fuq din ir-riċetta tas-soppa mitħuna tat-traħana u ħaxix. Soppa magħquda b’togħmiet ta’ ħxejjex differenti li żgur tissodisfak fil-jiem kesħin tax-xitwa.

Ħin: madwar siegħa

Ingredjenti

Għal 6-8 persuni

  • 3 mgħaref żejt taż-żebbuġa ekstra verġni
  • 1 basla kbira ħamra jew safra, imqattgħa
  • Melħ
  • 2 sinniet tewm, misħuqin
  • 340g zunnarija, imqattgħa dadi żgħar
  • 2 kurratiet kbar, il-parti bajda u ħadra ċara biss, imnaddfin u mqattgħin
  • 1½ kikkra traħana mill-qarsa
  • 2 litri stokk tal-ħaxix jew tat-tiġieġ, jew ilma
  • Bukkett ħxejjex aromatiċi mħalltin magħmul minn werqa tar-rand, żewġ friegħi timu u origanu, u 2 zkuk tursin.
  • Bżar mitħun frisk
  • Aktar żejt taż-żebbuġa u ħxejjex aromatiċi bħal nagħniegħ, tursin u xibt biex iżżejjen.
  • Bżar cayenne, jekk trid

 

  1. Saħħan 2 mgħaref miż-żejt taż-żebbuġa f’borma tal-qiegħ oħxon fuq nar medju. Żid il-basla u qalli għal 5-8 minuti sakemm tirtab. Żid niskata melħ, it-tewm, iz-zunnarija u l-kurrat. Kompli qalli u ħawwad sikwit sakemm il-ħaxix jibda jirtab.
  2. Żid il-kumplament taż-żejt u t-traħana u ħawwad għal minuta oħra biex it-taħana tinkesa biż-żejt. Żid l-istokk jew l-ilma u l-bukkett ta’ ħxejjex aromatiċi.
  3. Għolli n-nar u meta tiftaħ tagħli żid ftit melħ, baxxi n-nar u ħalliha ttektek għal 30 minuta sakemm il-ħaxix jirtab u t-taħana tinħall fis-soppa. Żid aktar melħ jekk ikun hemm bżonn u neħħi l-bukkett ħxejjex aromatiċi.
  4. Għal soppa ftit raffa itħan bi blender tal-idejn u jekk tridha aktar fina għaddiha minn passatur. Żid bżar mitħun frisk.
  5. Erġa’ saħħan bil-mod fuq nar baxx u servi bi ftit żejt taż-żebbuġa u ħxejjex aromatiċi friski fil-wiċċ ta’ kull platt. Tista’ troxx ukoll ftit bżar cayenne.

 

Din is-soppa tista’ tiġi ppreparata minn ġurnata qabel. Peress  li tkompli tagħqad, merraqha bi ftit stokk, ilma jew ħalib waqtli tkun qed issaħħanha.