Is-sider tat-tiġieġ hawn min ma jiggustahx għax ikun xi ftit xott, imma l-mod li bih issajru jagħmel differenza kbira. F’din ir-riċetta s-sider jibqa’ tari immens għax isir magħluq fil-foil u l-mili jżommu tari wkoll minn ġewwa.

Ħin: siegħa u 45 minuta

Isservi: 4 persuni

Ingredjenti:

• 4 isdra tat-tiġieġ kbar, mingħajr għadam u ġilda
• 400 g irkotta
• 200 g weraq tal-ispinaċi, tal-friża bil-friża mniżżla jew frisk u mgħolli, imsaffi mill-ilma
• 12-il lista rqiqa steaky bacon
• 50 g ġobon kefatoliri (tal-ħakk), maħkuk
• Niskata noċemuskata maħkuka friska
• Melħ u bżar mitħun frisk

Għaz-zalza:

• 6-8 tadamiet imdaqqsin, mingħajr żerriegħa u mqattgħin
• 6 sinniet tewm, imqattgħin
• Ponn ħabaq frisk
• Mgħarfa żejt taż-żebbuġa
• 150 ml krema singla jew friska
• Melħ u bżar mitħun frisk

Tħejjija:

1. Fi skutella kbira għaffeġ sew l-irkotta b’furketta. Żid il-ġobon kefatoliri, in-noċemuskata, u bżar u melħ. Żid ikoll l-ispinaċi magħsura u ħallat kollox sew flimkien.
2. Saħħan il-forn għal temperatura ta’ 200°C.
3. Aqta’ 4 biċċiet kwadri foil u poġġi fuq kull waħda tliet listi bacon għat-tul ħdejn xulxin.
4. Poġġi kull sider tat-tiġieġ bejn il-cling film u iftħu b’daqqiet ta’ lembuba jew mazza biex jiġi ħxuna waħda. Poġġi sider fuq kull biċċa foil bil-bacon.
5. Qassam it-taħlita tal-irkotta u spinaċi fuq kull sider u ifrixha. Bl-għajnuna tal-foil gerbeb kull sider bil-bacon b’kollox biex tifforma romblu bil-mili ġewwa. Geżwer il-foil sewwa mar-romblu u ssikka ż-żewġ trufijiet bħalma tqartas ħelwa. Jekk titqatta’ xi ftit il-foil, erġa’ gerbeb ir-romblu f’biċċa foil oħra.
6. Poġġi r-rombli mqarstin f’dixx u aħmi għal madwar 50-60 minuta, jew sakemm l-isdra jsiru minn ġewwa.
7. Sadanittant ipprepara z-zalza. Saħħan iż-żejt taż-żebbuġa f’kazzola, żid it-tewm u qalli għal ftit sekondi. Żid it-tadam, u melħ u bżar, ħalli t-tadam itektek sakemm jirtab. Żid il-krema u l-weraq tal-ħabaq u ħalli z-zalza terġa’ tisħon. Itħan iz-zalza sakemm tiġi likwida u lixxa.
8. Erġa’ saħħan iz-zalza fuq nar baxx.  Ferra’ ftit zalza fil-qiegħ ta’ kull platt li se sservi u ifrixha b’mgħarfa. Neħħi l-isdra mill-foil, b’attenzjoni mill-fwar li joħroġ. Aqsam kull wieħed min-nofs għat-tul u poġġi ż-żewġ nofsijiet fuq iz-zalza fil-platt.
9. Servi ma’ patata mixwija jew moqlija.

Ippruvajtha din ir-ricetta tas-sider tat-tiġieġ? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.

Would you like to read this recipe in English? Let us know in the comments section below!