Riċetta: Quiche bil-ħaxix aħdar

Quiche with green vegetables: Quiche bil-ħaxix aħdar

Read this recipe in English: Quiche with green vegetables

Fl-istaġun insibu ħafna ħaxix aħdar. Din il-quiche fiha tliet tipi ta’ ħaxix: il-broccoli, il-qarabagħli u l-piżelli. Jekk ma tiggustax xi wieħed minnhom tista’ tibdlu ma’ xi ħaxix ieħor.

Preparazzjoni: 20 minuta

Ħin total: siegħa u 25 minuta

Isservi: 8 persuni

Ingredjenti:

  • 500 g għaġina tat-torti (short crust)
  • 25 g ġobon Parmiġġan, maħkuk oħxon
  • 30 g prinjol (pine nuts), inkaljat
  • Ponn weraq tal-ħabaq frisk
  • 2 kuċċarini meraq tal-lumi
  • 2 imgħaref żejt taż-żebbuġa
  • 2 qarabagħliet twal, maqsumin min-nofs għat-tul u mqattgħin irqiq għall-wisa’
  • 200 g fjuri żgħar tal-broccoli
  • 6 bajdiet
  • 250 ml stokk tat-tiġieġ jew tal-ħaxix
  • 85 ml krema doppja
  • 100 g piżelli tal-friża

Ikollok bżonn ukoll fażola niexfa, kwalunkwe fażola mnixxfa, jiġifieri li trid ixxarrabha qabel ma ssajjarha. F'dan il-każ qed tintuża biex iżżomm l-għaġina f'postha mingħajr ma tinżel mill-ġnub jew tintnefaħ meta msajra mingħajr mili (blind baking). Tista' żżomm borża minnha għal dan l-iskop biss fil-friġġ.

Tħejjija:

  1. Saħħan il-forn għal temperatura ta’ 200°C. 
  2. Idlek turtiera ċatta ta’ 26 ċm dijametru biż-żejt jew butir.
  3. Iftaħ l-għaġina biżżejjed biex tiksi t-turtiera. Bl-għajnuna tal-lembuba, tella’ l-għaġina u iksi t-turtiera.
  4. Taqqab ftit il-qiegħ tal-għaġina b’furketta, iksiha bil-kartaforn u imliha bil-fażola niexfa. Aħmi għal 15-il minuta u neħħi l-fażola u l-karta. Erġa’ daħħalha fil-forn u aħmi għal 10 minuti oħra.
  5. Sadanittant poġġi l-ġobon Parmiġġan u l-prinjol fi proċessur tal-ikel u kisser sakemm jiġu frak.
  6. Żid il-ħabaq, il-meraq tal-lumi u nofs iż-żejt u ħallat sakemm isiru paste.
  7. Saħħan il-kumplament taż-żejt f’taġen kbir fuq nar moderat, qalli l-broccoli għal 5 minuti jew sakemm jirtab ftit.
  8. Żid il-qarabagħli u kompli qalli għal 5 minuti oħra jew sakemm il-ħaxix jibda jieħu l-kulur.
  9. Baxxi t-temperatura tal-forn għal 180°C.
  10. Fi skutella kbira ħabbat il-bajd, imbagħad żid miegħu l-istokk, il-krema doppja u l-paste tal-ħabaq u prinjol u ħabbat kollox flimkien.
  11. Ferra’ t-taħlita fl-għaġina u ferrex it-taħlita ta’ broccoli u qarabagħli u l-piżelli.
  12. Aħmi għal 40 minuta jew sakemm tara li l-mili għaqad.

Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.

Would you like to read this recipe in English? Let us know in the comments section below!