Is-soltu nagħmlu l-fenek stuffat u z-zalza tiegħu nżiduha mal-ispagetti. Dan il-platt tradizzjonali huwa tajjeb ħafna iżda kultant ikollna aptit dik ix-xi ħaġa differenti mis-soltu. Din ir-riċetta wkoll tikkumbina il-fenek mal-għaġin imma flimkien ma’ ingredjent ieħor popolari Mediterranju: il-qaqoċċ.
Ħin: siegħa u 30 minuta
Isservi: 4-6 persuni
Ingredjenti:
- 400 g għaġin linguine
- 500 g fenek
- 2 basliet, imqattgħin
- 2 sinniet tewm, imqattgħin
- 2 zkuk karfus ta’ Malta, imqattgħin
- Karrotta kbira, imqattgħa roti rqaq
- Mgħarfa klin (rosemary) imqatta’
- 400 g polpa tat-tadam
- 100 ml inbid aħmar
- 4 qaqoċċiet, qlub biss imqattgħin strixxi għat-tul ( KIF TIPPREPARA L-QAQOĊĊ)
- 200 ml stokk tat-tiġieġ
- 2 imgħaref żejt taż-żebbuġa
- Melħ u bżar mitħun frisk
- 80 g ġobon Parmiġġan
Tħejjija:
- Saħħan iż-żejt f’kazzola baxxa fuq nar moderat u aqli l-fenek. Tella’ l-fenek u poġġih fuq platt biex jibred.
- Sadanittant, fl-istess kazzola, qalli l-basla, it-tewm, il-karfus u l-karrotti.
- Aqla’ l-laħam tal-fenek minn mal-għadam u qattgħu, imbagħad erġa’ żidu mal-ħaxix fit-taġen flimkien mal-qaqoċċ, il-klin, u bżar u melħ.
- Żid l-inbid u ħallih jinxtorob ftit, imbagħad żid il-polpa u l-istokk. Għatti l-kazzola, baxxi n-nar u tektek għal 40 minuta. Ħawwad kultant u żid ftit ilma jekk ikun hemm bżonn.
- Meta jkun qorob il-ħin li ssir iz-zalza, għalli l-linguine f’borma kbira ilma bil-melħ sakemm isir al dente.
- Saffi l-għaġin, żidu maz-zalza u ħawwadhom flimkien.
- Għatti l-kazzola u ħallihom joqogħdu għal 2 minuti. Servi bil-ġobon Parmiġġan maħkuk fil-wiċċ.
Ippruvajtha din ir-riċetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar riċetti li jgħoġbuk.
Would you like to read this recipe in English? Let us know in the comments section below!
