Organizza lejla b'tema mhux tas-soltu meta jmissek tistieden ftit ħbieb id-dar: huwa faċli li toħloq lejla Kubana. Involvi lil sħabek fis-serata billi tgħidilhom jilbsu xi ħaġa adattata għall-okkażjoni wkoll ... b'libsa qasira għan-nisa u xi qmis iffjurita u kappell abjad għall-irġiel, ftit mużika Salsa, dan il-cocktail u dawn l-isnacks, ibdew iżfnu u oħolqu l-atmosfera.

Ir-riċetti t'hawn taħt kollha għal erba' persuni:

Cocktail: Cuba Libre

Imla 4 tazzi bis-silġ. Ħallat kikkra rum u 1/4 ta' kikkra meraq tal-lajm (minn 2 frottiet) u aqsam bejn l-erba' tazzi. F'kull tazza żid b'daqs 1/2 kikkra cola, ħawwad u servi b'felli lajm.

Ċips tal-Plantain (issibhom fil-ħwienet tal-ikel Afrikan) jew banana ħadra

Saħħan il-forn għal 175 °C, bl-ixkafef qisu terz minn fuq u terz minn isfel. Aqsam kilo plantains jew banana ħadra bejn żewġ folji tal-ħami, qaxxar u qatta' roti roti rqaq u tawwalin. Ħallat 1/4 ta' kikkra żejt u rranġahom ħdejn xulxin iżda mhux fuq xulxin fuq folja tal-ħami. Raxxax ftit melħ u bżar u sajjar fil-forn sakemm jismaru u jsiru jqarmċu, għal madwar 30-35 minuta. Dawwar il-folji tal-ħami u aqleb il-plantains wara xi kwarta. Poġġi ċ-ċips tal-plantains fuq il-karta tal-kċina biex tixrob iż-żejt żejjed, u meta jkunu birdu żommhom ġo kontenitur li ma jidħolx l-arja fih sa jumejn.

Pico de Gallo jew Salsa Fresca

Ġo skutella itfa' 3 tadamiet mqattgħa, basla żgħira mqattgħa, 1/2 kikkra cilantro frisk imqatta', 2 imgħaref meraq tal-lajm u bżaru jalapeño (jekk trid) mingħajr żrieragħ u mqatta' rqiq. Żid ftit bżar u melħ skont il-gosti u servi maċ-ċips tal-Plantain.