Riċetta: Christmas log

By: Fatima Eltham

Wieħed mill-aktar ħelu li nħobbu nagħmlu aħna l-Maltin fil-festi tal-Milied huwa z-zokk taċ-ċikkulata, jew aħjar il-Christmas log. Normalment nagħmluh bil-gallettini mfarrkin u ħalib magħqud, imma llum se nagħmluh forma ta' roly poly, verżjoni li tista’ tisserva wkoll bħala deżerta u xalata għal min iħobb iċ-ċikkulata.

Ingredjenti

Għal 16-il porzjon

Butir, biex tidlek
5 bajdiet
140g zokkor muscovado
100g dqiq self-raising
25g kokotina
Zokkor fin (caster sugar), biex troxx

Għall-ġelu

285ml krema doppja
450g ċikkulata skura ta’ kwalità tajba
Zokkor tal-ġelu (icing sugar), biex troxx

Metodu

Saħħan il-forn għal temperatura ta’ 170°C. Idlek u iksi bil-kartaforn tilar bix-xifer għoli ta’ 30ċm x 35ċm.
Issepara l-isfar tal-bajd mill-abjad u qegħedhom separatament f’2 bwieqi kbar. Mal-isfar tal-bajd żid iz-zokkor muscovado u 2 mgħaref ilma. B’ħabbata tal-elettriku ħabbat l-isfar tal-bajd maz-zokkor għal madwar 5 minuti, sakemm ikollok taħlita ċara u ħafifa. Għarbel id-dqiq u l-kokotina u żidhom mal-isfar billi titwihom fit-taħlita (fold in) b’mgħarfa tal-metall.
B’ħabbata nadifa ħabbat l-abjad tal-bajd sakemm jitla’ xkuma. Fi tliet darbiet żid l-ixkuma mat-taħlita billi titwiha b’mgħarfa tal-metall biex iżżomm kemm jista’ jkun arja fit-taħlita.
Ferra’ t-taħlita fit-tilar ippreparat u ifrixha sat-truf. Aħmi għal 10-12-il minuta, jew sakemm ikun sod in-nofs. Poġġi biċċa kartaforn kbira fuq il-wiċċ li qed taħdem fuqu u roxx biz-zokkor fin. Aqleb l-isponge fuq il-karta u aqla’ l-karta ta’ taħt bil-mod. Għatti b’sarvetta nadifa u ħalli l-isponge tiksaħ kompletament.
Aqta’ t-truf tal-isponge mad-dawra kollha. Bl-għajnuna tal-karta obrom ġenb mit-twal u kompli gerbeb bil-karta b’kollox.
Biex tagħmel il-ġelu: saħħan il-krema f’kazzola sakemm tagħli. Neħħiha minn fuq in-nar u kisser fiha 400g miċ-ċikkulata. Erġa’ poġġiha fuq in-nar u ħawwad sakemm iċ-ċikkulata tinħall kompletament. Ħalliha tibred, imbagħad kessaħ għal madwar siegħa sakemm il-krema tagħqad u tkun tista’ Kisser il-kumplament taċ-ċikkulata. Neħħi ⅓ mill-ġelu u ħalltu maċ-ċikkulata għall-mili.
Iftaħ l-isponge bil-mod u idlikha bil-ġelu taċ-ċikkulata mfarrka. Ħalli bordura ta’ 2ċm mit-tarf mingħajr ġelu. Erġa’ gerbeb l-isponge u poġġih fuq bord.
Aqta’ parti djagonali wiesgħa mit-tarf. Poġġi l-parti l-kbira fuq platt kbir jew bord tal-kejkijiet. Idlek it-tarf il-maqtugħ tal-biċċa ż-żgħira bi ftit ġelu u waħħalha mal-ġenb tal-biċċa l-kbira biex tifforma l-fergħa. Ikzi bil-ġelu u ħallih ftit raff jew għamillu sinjali bil-furketta biex jiġi jixbah zokk ta’ veru; għarbel fuqu ftit zokkor tal-ġelu u żejnu b’xi dekorazzjoni tal-Milied.