Jekk tħossukom ftit ħatja meta tieklu l-pizza, ippruvaw din ir-riċetta ta’ pizza stil ta’ antipasto biex żgur tħossukom aħjar – kemm għax fiha aktar ħaxix minn pizez oħrajn u kemm għax verament hija pizza tajba ħafna.
Ingredjenti
Għal 2 pizez
Għall-wiċċ
- 125ml zalza tat-tadam
- Ftit prosciutto, imqatta' bl-addoċċ
- 4 qlub tal-qaqoċċ immarinati, maqsumin f’erbgħa
- 100g bżar (capsicum) mixwi, jista’ jkun frisk jew ibbottiljat
- 85g żebbuġ aħdar, mingħajr għadma
- 50g tadam imnixxef
- 8 blalen żgħar ta’ mozzarella friska, Granarolo Mozzarella Mini, imfarrkin
- Weraq tal-aruka tari, biex isservi
Għall-għaġina
- 185ml ilma fietel
- 1 kuċċarina ħmira niexfa
- 2 mgħaref żejt taż-żebbuġa ekstra verġni
- 300g dqiq, magħrbul
- ½ kuċċarina zokkor
- ½ kuċċarina melħ
- Biex tagħmel l-għaġina ħallat flimkien l-ilma, il-ħmira u z-zokkor f’bieqja żgħira. Ħalliha wieqfa għal 5 minuti sakemm it-taħlita ssir qisha sponża, imbagħad żid iż-żejt taż-żebbuġa u ħawwad.
- Ħallat id-dqiq u l-melħ f’bieqja kbira; żid magħhom it-taħlita likwida u ħawwad b’sikkina b’xifer tond. Roxx il-wiċċ li qed taħdem fuqu bid-dqiq u aqleb it-taħlita fuqu. Agħġen it-taħlita sakemm ikollok għaġina lixxa u tiġġebbed. Poġġiha f’bieqja, għattiha b’sarvetta nadifa u ħalliha wieqfa għal 30 minuta, jew sakemm id-daqs tagħha kważi jirdoppja.
- Saħħan il-forn għal temperatura ta’ 230°C. Aqsam l-għaġina f’żewġ porzjonijiet. Iftaħ kull waħda għal ċirku ta’ 40ċm u poġġihom fuq żewġ tilari. Iksi l-wiċċ ta’ kull waħda biz-zalza, u rranġa l-prosciutto, il-qaqoċċ, il-bżar, iż-żebbuġ u t-tadam fuq kull waħda. Poġġi l-mozzarella mfarrka fil-wiċċ ta’ kollox.
- Aħmi għal 12-15-il minuta u ibdel l-ixkafef f’nofs il-ħin tas-sajran. Oħroġ mill-forn u żejjen bil-weraq tal-aruka.
Ippruvajt din ir-riċetta? Kif sibtha? Għidilna billi tħalli kumment hawn taħt.
