It-taħlita tal-kannella (cinnamon) u l-larinġ tagħmel togħma bnina. Dan il-kejk huwa ħafif ħafna u tistgħu tagħmlu verżjoni bla glutina billi tużaw dqiq speċjali bla glutina. Tista' wkoll, jekk trid, tnaqqas il-kontenut taz-zokkor bin-nofs u żżid mgħarfa stevia jew xi alternattiva għaz-zokkor.
Ingredjenti
250 g dqiq self raising
100 g butir
100 g zokkor
2 mgħaref trab tal-kannella (cinnamon)
3 bajdiet
2 mgħaref għasel
2 mgħaref meraq tal-larinġ
Qoxra ta' larinġa maħkuka
Nofs kuċċarina bikarbonat
Niskata melħ
Ftit zokkor mitħun biex tgħarblu fil-wiċċ tal-kejk
Saħħan il-forn għal 160 °C. Idlek loaf tin bil-butir u dawru bil-kartaforn. Għarbel id-dqiq. Żid il-kannella u l-larinġa maħkuka. Żid il-butir u ħaddmu ġod-dqiq. Żid iz-zokkor, il-melħ u l-bikarbonat.
Ġo skutella oħra ħabbat il-bajd, saħħan ftit il-għasel kemm ma jkunx magħqud u ħallat mal-bajd flimkien mal-meraq tal-larinġ.
Żid it-taħlita tal-bajd u l-għasel mat-taħlita tad-dqiq u ħawwad bil-mod. Tinkwetax jekk it-taħlita ma tkunx konsistenti imma oqgħod attenta li ma tħallatx wisq. Poġġi t-taħlita ġo dixx u aħmi għal 40 minuta. Oħroġ mill-forn u ħallih jiksaħ. Għarbel ftit zokkor mitħun fil-wiċċ.
