Aħna mdorrijin nixtru l-għaġin lest niexef għall-konvenjenza. It-Taljani jħobbu jagħmlu l-għaġin frisk huma d-dar. Għal din ir-riċetta m'hemmx bżonn ikollok magna tal-għaġin għax il-papardelle faċli tagħmilhom b'idejk. Ippruvaha u tara d-differenza.
Ħin: Siegħa
Isservi: 4-6 persuni
Ingredjenti:
Għall-għaġina
- 300g dqiq abjad
- 3 bajdiet
- Żejt-taż-żebbuġa
- Melħ
Għaz-zalza
- 200g krema likwida
- 12og ġobon gorgonzola, imfarrak
- 100g ġewż, imqaxxar u mkisser
- basla, imqattgħa rqiq
- butir
Tħejjija:
- Biex tagħmel il-papardelle: Ferra' d-dqiq fuq il-mejda u geddsu flimkien forma ta' muntanja. B'id waħda agħmel ħofra fin-nofs tad-dqiq u fiha ifqa' l-bajda, niskata melħ u mgħarfa żejt. Ibda ħawwad bil-mod b'furketta min-naħa ta' ġewwa għal barra. Meta l-bajda u ż-żejt jinxtorbu kompli agħġen b'idejk sakemm ikollok għaġina lixxa u elastika. Geżwer l-għagina fil-cling film u ħalliha toqgħod fil-friġġ għal 30 minuta.
- Sadanittant għalli borma b'ħafna ilma bil-melħ biex fiha tgħalli l-għaġin.
- Iftaħ l-għaġina rqiq u, biex tagħmel il-papardelle, aqta' strixxi ftit wisgħin u qosra. Niżżilhom fl-ilma jagħli.
- Sadanittant agħmel iz-zalza. Qalli l-basla fi ftit butir u żid il-krema. Kif tibda tbaqbaq żid ukoll il-ġobon u l-ġewż.
- Saffi l-għaġin u itfgħu maz-zalza. Ħawwadhom flimkien u servi fil-pront.
Ippruvajt din ir-riċetta? Kif sibtha? Għidilna billi tħalli kumment hawn taħt.
