Kontorn ta’ ċentinarja bil-basal u l-bacon li tista’ tħejji f’ħin qasir u faċilment. Iċ-ċentinarja tqarmeċ u tieħu t-togħmiet tal-ingredjenti u l-ħxejjex aromatiċi.
Ħin: 40 minuta
Isservi: 4 persuni
Ingredjenti:
- Mgħarfa żejt taż-żebbuġa
- 3 listi bacon , imqattgħin
- 2 ċentinarji kbar, imqaxxrin, maqsumin f’erbgħa għat-tul, biż-żerriegħa maqlugħa, u mqattgħin għall-wisa’ f’biċċiet ta’ ½ ċm ħxuna.
- Basla kbira, maqsuma min-nofs u mqattgħa għat-tul
- 4 sinniet tewm, misħuqin
- 2 imgħaref inbid abjad
- Kuċċarina klin frisk (rosemary), imqatta’
- Kuċċarina sagħtar frisk (thyme), imqatta’
- Mgħarfa meraq tal-lumi
- Melħ oħxon u bżar mitħun frisk
Tħejjija:
- Saħħan taġen fuq nar moderat u ixwi l-biċċiet tal-bacon sakemm jiħmaru. Neħħihom mit-taġen u poġġihom fuq platt.
- Saħħan iż-żejt taż-żebbuġa fl-istess taġen u żid iċ-ċentinarja, il-basal u t-tewm.
- Għatti t-taġen u sajjar għal madwar 10 minuti, filwaqt li tqalleb kull tant ħin, sakemm jibdew jiħmaru.
- Żid l-inbid, il-klin u s-sagħtar u kompli tektek mgħotti għal 10 minuti jew sakemm issir iċ-ċentinarja.
- Neħħi minn fuq in-nar u żid il-bacon. Roxx bil-meraq tal-lumi, bil-melħ u l-bżar mitħun frisk u servi sħun.
Ippruvajtha din ir-ricetta? Għoġbitek? Ħalli l-kummenti u r-rating tiegħek hawn taħt u agħfas share biex inkomplu nwasslulek aktar ricetti li jgħoġbuk.
Would you like to read this recipe in English? Let us know in the comments section below!
