Jekk għandek xi ftit banana li saret iżżejjed biex tqaxxarha u tikolha, tarmihiex, imma agħmel dawn il-muffins tal-banana u karawett li żgur jitgħoġbu minn kulħadd, kemm kbar u kemm tfal.
Ingredjenti
Għal 10 muffins
- 375g dqiq self-raising, mgħarbul
- ½ kuċċarina trab tal-ħami (baking powder), mgħarbul
- 200g zokkor ismar
- 2 bajdiet, imħabbtin ħafif
- 400g banana, mgħaffġa
- 2 kuċċarini qoxra tal-lumija, maħkuka
- 2 mgħaref meraq tal-lumi
- 200ml żejt veġetali
- 125ml ħalib
- 250g ġobon artab (Philadelphia)
- 2 mgħaref butir tal-karawett (peanut butter)
- 45g zokkor tal-ġelu (icing sugar), mgħarbul
- Biċċiet tal-banana mnixxfin, biex iżżejjen
- Saħħan il-forn għal temperatura ta’180°C. Iksi 10 toqob ta’ landa tal-muffins bil-forom tal-karta apposta għall-muffins. Ħallat id-dqiq , it-trab tal-ħami u z-zokkor ismar f’bieqja. Agħmel ħofra fin-nofs. Fiha itfa’ l-bajd, il-banana mgħaffġa, il-qoxra maħkuka u l-meraq tal-lumija, iż-żejt u l-ħalib. Ħawwad sakemm jitħalltu.
- Qasam it-taħlita bejn l-għaxar kontenituri tal-karta u aħmi għal 20 minuta, sakemm tara li ħmaru. Ħallihom jibirdu ftit fil-landa qabel tpoġġihom fuq gradilja biex jiksħu.
- B’ħabbata tal-elettriku ħabbat il-ġobon Philadelphia, il-butir tal-karawett u z-zokkor tal-ġelu f’bieqja għal 4 minuti, sakemm it-taħlita tiċċara u ssir kremuża.
- Ifrex il-krema tal-karawett fuq il-muffins u żejjen bil-biċċiet tal-banana nixfin.
Ippruvajt din ir-riċetta? Kif sibtha? Għidilna billi tħalli kumment hawn taħt.
