Read this recipe in English: Duck breast with pepper and blackcurrant sauce
Platt eleganti għal żewġ persuni li huwa faċli biex tippreparah fi ftit ħin sabiex ikollok aktar ħin biex tqattgħu mal-maħbub jew maħbuba tiegħek. Bħala kontorn tista’ żżid patata maxx u brokkli li jmorru tajjeb ħafna mal-papra; ibda l-ewwel billi tgħalli l-patata fl-ilma u l-brokkli sajru fuq il-fwar tagħha. Sakemm issir il-patata tilħaq tipprepara l-papra.
Ħin: 25 minuta
Isservi: 2 persuni
Ingredjenti:
- 2 isdra tal-papra
- 2 mgħaref bżar iswed, imfarrak
- Melħ
- 3 mgħaref port
- 2 mgħaref ħall tal-inbid aħmar
- 4 mgħaref ġamm tal-blackcurrant
Tħejjija:
- Fellel ħafif il-ġilda tal-papra: għat-tul, imbagħad għall-wisa’. Ippressa l-bżar mal-ġilda tal-papra u roxx bil-melħ.
- Saħħan taġen fuq nar għoli u ixwi l-papra fuq in-naħa tal-ġilda għal 6 minuti, sakemm tiħmar u ssir tqarmeċ, imbagħad dawwarha fuq in-naħa l-oħra u ixwi għal 4 minuti oħra. Poġġi l-papra fuq platt u żommha għas-sħana. Neħħi x-xaħam li jkun ħareġ minnha mit-taġen.
- Erġa’ poġġi t-taġen fuq nar moderat u żid il-port, il-ħall tal-inbid aħmar u l-ġamm. Ħalli t-taħlita tbaqbaq għal 2 minuti sakemm tibda tagħqad, u żid ftit melħ.
- Qatta’ s-sider tal-papara djagonali, ifrex fuqha z-zalza u serviha mal-patata maxx u brokkli.
Ippruvajtha din ir-riċetta? Għoġbitek? Għidilna billi tħalli kumment u r-rating tiegħek hawn taħt u agħfas share.