F’din ir-riċetta tista’ tuża kemm il-lingwini, li huma bħal spagetti imma ċatti, u kemm spagetti rqaq. Riċetta ta’ għaġin bil-bajd u l-bacon li txbah xi ftit lill-carbonara bid-differenza li fiha ż-żieda tal-ħaxix li jagħmel il-platt aktar komplut.
Ħin: 35 minuta
Isservi: 4 persuni
Ingredjenti:
- 350g lingwini jew spagetti rqaq
- 4 listi ħoxnin bacon, imqatta’
- 80ml inbid abjad
- 3 sinniet tewm, imqattgħin irqiq
- 1 bżaru aħmar ħelu (capiscum), imqatta’ rqiq
- 4 bajdiet, imqabbtin ħafif
- 180ml krema singla
- Bukkett weraq tal-ispinaċi tari
- 100g ġobon pecorino jew Parmiġġan, maħkuk oħxon
- Ponn tursin jew ħabaq frisk, imqatta’
- 1 bajda mgħollija iebsa, imqaxxra u mqattgħa
- Bżar mitħun frisk
Tħejjija:
- Poġġi borma kbira bl-ilma bil-melħ fuq nar għoli u għalli l-għaġin mingħajr ma ssajru żżejjed (al dente).
- Sadanittant saħħan taġen fuq nar moderat u ixwi l-bacon sakemm jiħmar. Neħħih mit-taġen u poġġih fuq karta tal-kċina biex joqtor. Fl-istess taġen żid it-tewm u l-inbid. Meta jiftaħ jagħli baxxi n-nar u ħallih ibaqbaq bil-mod u mikxuf għal 3 minuti. Żid il-bżar aħmar ħelu u ħawwad għal 2 minuti. Baxxi n-nar għal bati ħafna.
- F’bieqja ħabbat il-bajd u l-krema u ferragħhom fit-taġen. Ħawwad għal 2 minuti mingħajr ma tħalli l-bajd jagħqad.
- Saffi l-għaġin u erfa’ kikkra mill-ilma tiegħu. Erġa’ itfa’ l-għaġin fil-borma, żid it-taħlita tal-bajd u poġġi l-borma fuq nar moderat. Żid il-bacon , l-ispinaċi, it-tursin jew ħabaq, il-ġobon, u bżar mitħun frisk u ħawwad. Żid kemm ikun hemm bżonn mill-misħun biex l-għaġin jiġi kremuż.
- Servi fil-pront bil-bajd mgħolli u mqatta’ fil-wiċċ, u aktar ġobon u bżar jekk tixtieq.
Ippruvajt din ir-riċetta? Kif sibtha? Għidilna billi tħalli kumment jew ir-rating hawn taħt u agħfas share.
